Debate Reforma Local: Davila acusa a Montoro de potenciar as deputacións e privatizar servizos
A deputada do BNG puxo de manifesto a auténtica pretensión deste proxecto de lei que é o de ampliar as capacidades de decisión e intervención do Goberno en decisión de ámbito local. Van recortar de forma substancial as competencias autonómicas para deseñar e aplicar un modelo local propio, que desde logo, non vai ter en contra as especificidades dun territorio como o galego, caracterizado pola dispersión e o envellecemento poboacional.
Davila tildouno de reforma antidemocrática porque pretende limitar a acción política daqueles concellos que teñen vontade de exerceren a iniciativa pública sexa reforzando os seus servizos públicos, procurando fórmulas alternativas de financiamento ou xestión ou estimulando as actividades económicas locais.
Consolidan as deputacións provinciais
A portavoz do BNG denunciou que o Goberno do PP consolide as duplicidades administrativas, e reforza as entidades máis anacrónicas, en referencia directa ás deputacións provinciais. Se algo quedou demostrado nestas décadas é a inutilidade das corporacións provinciais á hora de prestar servizos locais, que dificilmente poden ter unha base provincial como agora pretenden, e aludiu ás augas, residuos, servizos sociais.
Ademais, Davila puxo de releve a outra intencionalidade do proxecto que é a de afondar no proceso privatizador dos servizos públicos, optando pola xestión indirecta destes. Nese sentido, salientou que a estrutura administrativa das deputacións, que teñen escasa organización de servizos prestacionais, incentivará a delegación cara ao sector privado da responsabilidade de organizar e xestionar servizos até agora municipais.
A portavoz do BNG acusou o Goberno de ir en contra de todos e de todo e salientou que se trata dun proxecto criticado de xeito unánime polo mundo local. Sinalou que a reforma preferente para os concellos é o financiamento local, algo que elude o Goberno, e por riba emprega esta reforma local como cortina de fume para evitar a necesidade de actuar contra o incremento das desigualdades sociais.
Non peche a lei e dialogue
Criticou o Goberno polas formas: xa que foi un proceso falto de diálogo, de imposición autoritaria dun novo modelo local de distribución competencial que non foi consensuado nin coas CC.AA nin coas entidades municipais. Davila apelou a Montoro ao diálogo: vostede rematou o seu discurso amosándose aberto ao diálogo. Desde o BNG dicímoslle que non peche a lei sen chegar ao consenso coas entidades locais e CC.AA. Teña en conta as emendas e alegacións formuladas desde a Federación Galega de Municipios, porque vostede tivo a virtude de pór en contra da lei a alcaldías do PP, do PSOE, do BNG e de todo tipo de formacións. A portavoz do BNG pediu a devolución ao Goberno desta lei para posibilitar unha reforma radicalmente distinta, tanto na súa tramitación como no contido. Partindo da base do respecto pola autonomía local e as competencias das CC.AA.