Davila pide a Catalá xulgados especializados en delitos económicos e máis medios contra a corrupción
Davila criticou a reforma penal e a tildou de tímido cambio na normativa procesal, e reprochou a Catalá que se deixe á marxe calquer compromiso de ampliación e modernización de medios materiais e humanos na administración de xustiza. Tamén puxo en evidencia a falla dunha memoria económica para levar a cabo esta reforma.
Só se pode axilizar a xustiza penal con máis medios e xulgados
A deputada do BNG díxolle a Catalá que con estes proxectos apenas variará a tramitación dos procesos penais, sobre todo no que atinxe á demora e as dilacións que sofren. Neste sentido, resaltou que de nada sirve pór un límite temporal máximo cando non hai un reforzo de medios materiais nos Xulgados e Fiscalías. É cuestionábel que vaia ser efectiva a axilización procesal propugnada através da fixación dun límite legal cando o único que permitiría maior celeridade nos procesos sería a existencia de máis xulgados especializados, equipas de especialistas e auditores de apoio e xuices en exclusiva.
Nesta liña, Davila demandou a Catalá un aumentos dos medios nos xulgados. Pediu a adicación exclusiva para casos complexos de delitos de corrupción ou económicos, a supresión de aforamentos, os límites aos indultos ou a creación de xulgados especializados en determinados delitos, sobre todo de delincuencia económica.
Sinalou que se precisa unha reforma penal global pero o Goberno limitouse a modificacións parciais, que se quedan cortas en relación ás demandas plantexadas desde o ámbito xurídico. A deputada do BNG afirmou que esta reforma penal está abocada ao fracaso porque non aborda unha reforma radical da xustiza criminal e non supón un incremento de medios e recursos humanos para acelerar a xustiza criminal.