Carme Da Silva defende que "a nova Lei de Urbanismo reflicta a realidade galega"
A deputada nacionalista presentou o documento elaborado polo BNG sobre as Bases para unha nova Lei do Urbanismo en Galiza no que reclama definir con nitidez as competencias da Xunta e Concellos nesta materia
Da Silva considerou que a nova Lei non pode obviar o existente e propuxo tentar canalizado ao fin de reordenalo porque de non facelo así, dixo, cada vez terá peor aspecto e a súa solución será máis difícil.
A deputada que defendeu as bases para unha nova Lei alternativa á presentada polo Goberno galego, destacou entres os seus principios: recoller a realidade galega e adaptarse a ela, respectar o patrimonio edificado e distinguir de maneira nítida as competencias que deben asumir a Xunta e os concellos.
As administracións deben asumir responsabilidades
Da Silva aclarou que algúns concellos cometeron erros na planificación e execución urbanísticas sen embargo, dixo, as maiores agresións foron executadas pola Xunta de Galiza e o Goberno do Estado, recheos dos portos e o encoro de Caldas, son claros exemplos destas actuacións, afirmou.
A nova lei debe recoller a realidade galega, respectar o patrimonio edificado e distinguir de maneira nítida as competencias da Xunta e os concellos
Neste sentido, considerou que todas as administracións deben asumir a súa responsabilidade polo que é imprescindíbel que a nova Lei de Urbanismo defina as competencias, xa que de non ser así, non avanzaremos nin resolveremos as cuestións de fondo.
Para a deputada nacionalista é necesario partir de cero e establecer criterios que resolvan unha situación urbanística que cualificou de mala. É moi importante, engadiu partir da reflexión e a responsabilidade e que todos e todas contribuamos nunha lexislación que nos axude a levar a práctica accións que melloren a actual situación.
Documento alonxado da realidade
En alusión ao documento das bases presentado pola Xunta, a parlamentaria asegurou que non é o inicio máis adecuado porque, ao seu xuízo, parte dunha análise errónea da realidade galega.
Ademais, evita referirse ás propias competencias exclusivas da Xunta no ámbito urbanístico e ordenación do territorio e centra a atención nos concellos, nos plans xerais e equipas redactoras e a universidade.
Na súa alocución, Da Silva explicou que o regulamento do planeamento sobre o que se traballa é do ano 78 e dende a Lei do ano 85 segue pendente a súa regulación, a Xunta debería ter feito este traballo ao longo dos anos, manifestou.
É un erro copias leis foráneas porque Galiza non é nin Murcia nin Castela
A nacionalista deixou clara a postura do BNG no que atinxe a seguir aplicando parches polo que volveu reclamar unha Lei urbanística adaptada á realidade galega e unha clara definición do marco competencial.
Da Silva considerou un erro tentar copiar leis foráneas porque Galiza, afirmou, posúe un asentamento territorial moi diferente a Castela ou Murcia.
A deputada do BNG concluíu apostando por un acordo, entre as distintas forzas políticas, ao fin de acadar un texto novo que recolla as peculiaridades da situación urbanística galega e que resolva os problemas, unha nova Lei de Urbanismo, dixo, que ademais sexa asumida pola sociedade.