O BNG rexeita os Orzamentos por "continuístas" e incidir en políticas erráticas

A deputada Ana Pontón afirmou que os últimos Orzamentos da Lexislatura continúan na senda das políticas que causaron “ paro, pobreza, desigualdade, inxustiza e consolidou a Galiza como un país Low Cost”. A parlamentaria lamentou que, unha vez máis, "o rodillo" do Partido popular non aceptara nigunha das emendas presentadas pola oposición.

 Pleno.- A parlamentaria do BNG, Ana Pontón pediu a retirada dos últimos Orzamentos da lexislatura e modificar a estrutura de gastos. A deputada manifestou os orzamentos camiñan na senda das políticas que causaron “paro, pobreza, desigualdade, inxustiza e consolidan a Galiza como un país Low cost”.

A política do Goberno dixo, “deixou na cuneta a persoas que sufriron con maior crueza unha crise causada pola banca e un modelo colapsado” e estes orzamentos, recalcou, insisten “nunha política errada” consolidando o papel marxinal e espolio do noso país.

As políticas do Goberno popular e de Feijóo,engadiu, incrementaron o desmantelamento do tecido producido, as desigualdades e agudizaron “os problemas de Galiza antes da crise”. No ano 2014, explicou a nacionalista, dous de cada dez fogares declaran ter moitas dificultades para chegar a fin de mes e segundo os datos de Cáritas existen en Galiza máis de 600 mil persoas en risco de pobreza e exclusión social, circunstancia que “o Goberno sempre intentou minimizar”. Por outra parte, temos 177.000 persoas en paro sen prestación que viven grazas ao “colchón da solidariedade familiar” e vemos como durante a crise desenvolvéronse novas “formas de pobreza” en xente traballadora con salarios que non lles permiten chegar a fin de mes.

A deputada criticou que nove de cada dez empregos sexan precarios cunha duración dunha semana, un mes ou por horas, iso, dixo, “non é crear emprego de calidade” e lembrou que un de cada tres traballadores cobran menos de 1.000 euros e tres de cada dez están por debaixo do salario mínimo interprofesional.

Xa no debate sobre as emendas, Pontón criticou que o goberno non aceptara “ningunha” das máis de 450 presentadas polo BNG destinadas a modificar o que cualificou de prioridades entre as que destacou as destinadas a: “crear emprego e contra a precariedade, loitar contra emigración, a defensa do medio ambiente, garantir os dereitos sociais e servizos públicos e emendas que defendan a nosa lingua e cultura”.

Emendas defendidas polo BNG

Presidencia: Rectificar as políticas de recortes en Igualdade e prevencións da violencia de xénero con medidas “reais” para erradicar as causas con “catro millóns de euros para promoción da Igualdade”.

Turismo: Mudar o modelo centrado exclusivamente no Camiño de Santiago e diversificar o turismo cun Plan estratéxico dotado con catro millóns de euros.

Emigrantes: Dotar con 2,3 M€ para garantir a prestación pública sanitaria aos emigrantes despois do desmantelamento do centro hospitalario de Bos Aires.

Vicepresidencia: Recuperar os niveis do ano 2009 para cooperación e rescatar os servizos públicos privatizados como os parques de bombeiros dotándoos de 7,7 M€ e destinar 3,6M€ para incrementar o emprego público nos concellos.

Facenda: Dotación de 2,8 millóns de euros para loitar contra o fraude, evasión e elusión fiscal practicadas polas grandes empresas e grandes patrimonios e “crear unha oficina de control orzamentario” como instrumento para confirmar a execución das partidas aprobadas no Parlamento.

Medio Ambiente e Ordenación do Territorio: Destinar 12 millóns de euros para rexenerar as rías priorizando a Ría do Burgo e a de Ferrol cun alto nivel de contaminación. Sobre os residuos, Pontón defendeu apostar pola compostaxe en plantas comarcais e manifestou o seu rexeitamento ao modelo SOGAMA. Incrementar as axudas por fauna salvaxe e aumentar os espazos protexidos foron algunhas das propostas nesta materia.

Infraestruturas e transporte: Reducir o gasto en cemento e incrementar e rescatar as políticas sociais de vivendas, unha das partidas que o Goberno de Feijóo “máis rebaixou”. A deputada propuxo destinar 20 M€ para aluguer social e rehabilitación e contra os desafiuzamentos.

Sobre trasporte pediu a súa modernización, a intermodalidade e sostenibilidade apostando por servizos de cercanias cunha dotación de 5,5 millóns de euros.

Economía, emprego e Industria

O BNG prioriza nesta materia a “creación de emprego de calidade” actuando contra a fenda salarial e a precariedade laboral entre a mocidade e mulleres así como proxectos innovadores para o Sector naval cun centro de reparacións para Ferrol como prometeu o propio Feijóo no ano 2009. A loita contra a “pobreza enerxética” e o impulso “dunha tarifa eléctrica galega” tamén foi motivo dunha emenda nacionalista.

Cultura e Educación: O BNG propón rescatar a cultura da asfixia económica a que someteu á cultura o Partido popular apostando pola promoción do libro en galego, a rehabilitación do patrimonio cultural, rescatar da xestión privada os centros de arqueoloxía, eliminar os recortes no ensino público recuperando profesorado e a gratuidade do libro de texto.

Incrementar o orzamentos para as universidades en seis millóns de euros así como as bolsas para o acceso á universidade. Pontón reivindicou mais medios para “normalizar a lingua galega” incrementando o seu uso.

Sanidade: O BNG propón 42 millóns de euros para a “reversión” do Hospital de Vigo que debe ser “cen por cen público”. Medidas de choque contra as listas de garda e dotar de melloras a atención primaria e atender a demanda da vacina da meninxite B.