O BNG presenta 40 propostas contra "o fiasco" das políticas de Feijóo
As propostas de resolución do BNG buscan o impulso do emprego, a economía, os sectores básicos e o apoio a cultura e lingua galega
O grupo parlamentario do BNG presenta corenta propostas de resolución no Debate de Política xeral entre as que reclama unha investigación sobre as causas e responsabilidades do accidente ferroviario de Angrois e o proceso de privatización do novo hospital de Vigo, Álvaro Cunqueiro.
Ana Pontón, encargada de presentar ante os medios de comunicación as corenta propostas do BNG asegurou que van destinadas a impulsar o emprego, a economía, os sectores básicos e apoiar a cultura e lingua galega.
Feijóo descoñece a realidade galega
Para a deputada, Feijóo onte no debate demostrou non coñecer os problemas deste país e confunde as estatísticas coa realidade ademais de esquecer a principal preocupación de todos os galegos e galegas que é o paro e a emigración. Constatamos tamén, dixo, a súa incapacidade para dar resposta ás preocupacións da sociedade galega.
A parlamentaria asegurou que detrás dos anuncios e promesas de Feijóo non hai vontade real de rectificar a súa política errática e sobre todo estamos ante un goberno esgotado para enfrontar o retos que a sociedade galega ten por diante.
40 propostas limitadas polo acordo PP-PSOE
A deputada criticou o acordo bipartidista que limita a presentación de 40 propostas de resolución por grupo parlamentario suxeitas ademais a un corsé na súa formulación, en todo caso, dixo, as propostas do BNG abordan tres eixos para acabar coa submisión de Galiza aos intereses de Madrid e da U.E, a defensa dos dereitos sociais e de igualdade e un novo modelo territorial e ambiental.
Galiza, unha nación con dereito a poder decidir o seu futuro
Neste sentido, destacou o modelo de financiamento aceptado por Feijóo que discrimina a Galiza polo que o BNG propón un cupo co que se poderían recadar 2.000 millóns de euros máis ao ano así como unha fiscalidade plena subindo os impostos ás rendas máis altas e novos impostos a empresas que contaminen o medio ambiente e as grandes superficies comercias. A maiores, o BNG propón outro imposto ás empresas subministradoras de ADSL destinándoo ao apoio do audiovisual e o cinema. Pontón tamén reclamou que Feijóo rectifique sobre a suba de hidrocarburos que fai que a gasolina sexa máis cara en Galiza.
Crear unha Banca pública galega, unha tarifa eléctrica galega, derogar o imposto ao sol e acabar coas as peaxes abusivas na AP 9 e na D 53 son algunhas das propostas que defenderá o BNG. Asemade, propón crear un fondo dotado con 400 millóns de euros para desenvolver o servizo de cercanias do ferrocarril.
A deputada tamén defendeu un plan de emprego cun apoio real ao sector naval, pesqueiro, marisqueiro e medio rural e pediu que se cuestione o decreto sobre as axudas ao sector lácteo que discrimina aos produtor@s galegos polo que propuxo crear unha comisión de seguimento do acordo e medidas eficaces.
Pontón tamén aludiu ao I+D+i, ámbito no que o goberno galego, dixo, aplicou grandes recortes e reclamou unha Lei galega da Ciencia e da Investigación para este sector estratéxico destinando o 3% do PIB.
A deputada salientou que é necesaria unha nova lei do solo e considerou que non se pode falar dun novo modelo ambiental se Ence non sae da ría.
Dereitos sociais e Igualdade
Neste bloque de propostas, o BNG reclama eliminar os vetos e corsés no Parlamento imposto polo PP e PSOE e que a participación a través de consultas populares sexa real nesta institución.
10.000 vivendas de promoción pública contra os desafiuzamentos
A loita contra os desafiuzamentos cun plan especial para que durante os próximos 5 anos se poñan en marcha 10.000 vivendas de promoción pública en aluguer, medidas para loitar contra a corrupción, que Galiza conte cunha radio e televisión públicas que non estean ao servizo do Partido popular, unha comisión de investigación sobre a privatización do Hospital de Vigo e que a concesionaria asuma todas as deficiencias do centro, son outras das propostas presentadas hoxe polo BNG.
Pontón reclamou unha solución para os preferentistas, os emigrantes retornados e o colectivo long hope que reclaman as súas pensións a Noruega.
A parlamentaria pediu axilizar o cobro da RISGA en dous meses e que se cumpra a lei de igualdade no emprego. Tamén reclamou ampliar as axudas ás vítimas de violencia de xénero introducindo a figura de feminicidio.
Finalmente, reclamou unha nova etapa para a lingua galega e que se apliquen as leis de Normalización Lingüística e cun novo decreto que cumpra o Plan xeral de Normalización Lingüística.
A parlamentaria do BNG concluíu pedindo que se recupere a consellería de cultura con máis fondos e que un dos edificios da cidade da Cultura sexa destinado a unha pinacoteca nacional galega