O BNG pide explicacións a Educación e que interveña Sanidade nos comedores escolares

A deputada do BNG, Carme Adán cualifica de "inconcibible" que a  comida  para  os  comedores escolares  galegos viaxe de Málaga a Arousa  e de Málaga a Cuntis 

A deputada do BNG, Carme Adán anunciou, en sede parlamentar ante os medios de comunicación, o rexistro de diversas iniciativas demandando da consellería de Educación “explicacións da situación dos comedores escolares” e que “interveña Sanidade”.

A parlamentaria lembrou que existían denuncias sobre o mal estado da comida e non se actuou. Nos podemos aceptar, afirmou, que criterios económicos nos concursos na licitación dos comedores escolares primen sobre a calidade da comida. A deputada preguntou se non hai empresas en Galiza suficientes para dar de comer aos nenos e as nenas e con produtos da terra para que a comida teña que percorrer mil quilómetros “ e chegar en mal estado”.

Adán anunciou que o BNG ven de rexistrar unha iniciativa, polo trámite de urxencia, para que a consellería de Educación revise a súa política de externalizar o servizo. A calidade da comida, explicou a nacionalista, “era moi boa” cando se facía nos propios centros e polo persoal da consellería e neste momento constatamos que os caterings “son un verdadeiro problema”. Cremos, engadiu, que alimentación dos máis pequenos debe ter a maior calidade polo que rexistramos unha iniciativa para que Sanidade actúe “revisando todos os servizos e elaborando un plan de calidade dos comedores escolares primando os produtos galegos de calidade, peixe, carne, patacas... e que o caldo non viaxa dende Málaga a Arousa ou dende Málaga a Cuntis”.

A deputada concluíu reclamando unha explicación rápida das consellerías de Educación e Sanidade ante o que cualificou de “situación escandalosa” .