O BNG insta á Xunta a incoar expediente contra a Igrexa
Logo da "esperpéntica" cerimonia de entrega do Códice, é tempo de depurar responsabilidades e de adoptar medidas para que non se volvan repetir feitos como os acontecidos entorno a esta obra.
Así se manifestou a portavoz do GP do BNG, Ana Pontón, esta mañá, ao tempo que criticaba a desafortunada presenza do presidente do goberno do Estado, Mariano Rajoy, onte en Santiago na dita cerimonia.
A voceira do grupo nacionalista, durante unha rolda de prensa no Parlamento, explicou que todo o acontecido entorno ao roubo do Códice, máxime cos dados que se están coñecendo día a día, demostran que o BNG estaba acertado dende o primeiro momento na súa posición.
Neste sentido, reiterou que os feitos non poden saldarse sen que asuman as súas responsabilidades tanto a Igrexa, que ten a obriga de custodiar a obra, como a Xunta, que por lei debe garantir a proteción do Patrimonio.
Iguais ante a lei
Para Ana Pontón, as leis están para aplicarse por igual en todos os casos e segundo a lexislación vixente, lembrou, todas as persoas, entidades, institucións públicas ou privadas que sexan titulares de bens patrimoniais galegos teñen a obriga da salvagardalos e garantir a súa seguridade e conservación.
O caso do Códice non pode saldarse sen a asunción de responsabilidades da Igrexa e da Xunta e sen medidas que melloren a proteción do patrimonio e a súa difusion
A parlamentar considera que, por tanto, a Xunta debe incoar expediente á Igrexa porque incumpriu claramente a lei no caso do Códice e adoptar medidas para que casos como este non se repitan e para que a conservación e difusión do rico patrimonio deste País sexa unha realidade.
Inventario de bens e revisión de acordos
Pontón asegurou que nestes momentos hai grandes eivas en materia da posta en valor do patrimonio, nomeadamente da Igrexa, e está moi desprotexido, polo que reclamou, como medidas máis urxentes, que se faga un inventario de todos os bens que posúe nestes momentos o clero e en que estado se atopan.
Asemade, pediu a revisión dos acordos Xunta-Igrexa, de tal xeito que algúns dos bens cambien a súa titularidade, pois fica demostrado que os acordos actuais son ineficaces, ou alguén aínda pode confiar en que a Igrexa siga custodiando obras de tanto valor como o Códice?.