O BNG exixe a Feijoo que dea explicacións pola negativa a dimitir do alcalde de Baralla
Ante a negativa a dimitir de González Capón, a responsabilidade é agora do presidente do PP en Galiza
Para o BNG, tal e como tamén expuxo o portavoz do BNG no Concello de Baralla, Xosé Manuel Becerra, pedir desculpas polas súas afirmacións non abonda, non fica outra saída que asumir as responsabilidades políticas e abandonar o seu cargo. Por esta razón é preciso que o PP a nivel galego dea as explicacións oportunas sobre cales son os motivos que levan a esta formación política a permitir a continuidade dentro das súas filas a unha persoa cun comportamento tan taxativamente lamentábel.
Segundo explicou Xosé Manuel Becerra, diante da gravidade das declaracións do rexedor e deputado provincial do PP, o BNG vai solicitar a súa dimisión na Deputación provincial, co que será a primeira vez na historia da democracia que unha institución solicite a dimisión dun cargo diante dunhas declaracións deste tipo que negan a historia e falsean a realidade.
Por iso, o BNG reitera, máis unha vez, que se o PP non obriga a González Capón a dimitir estará avalando as declaracións feitas por esa persoa.