O BNG denuncia "trato discriminatorio do PP" na tramitación das leis

A deputada do BNG, Ana Pontón denuncia a “hipocrisía” do Partido popular sobre a transferencia da AP-9 e acusa a Feijóo de “ir de farol” na reclamación da infraestrutura

A deputada do BNG, Ana Pontón anuncia que o Grupo parlamentario do BNG presentará ante a Mesa do Parlamento unha queixa “polo trato discriminatorio do PP na tramitación das leis” en relación a constitución, hoxe, da ponencia da Lei do Solo debatida o 24 de novembro do 2015 mentres a ponencia da AP-9 segue sen constituírse a pesar terse debatido o 29 de setembro do 2015 e co prazo de emendas rematado o 12 de novembro.

A deputada cualifica de “hipócrita” a postura do Partido popular sobre a transferencia da A-9 e acusa a Feijóo de “xogar de farol” cando en realidade “non ten interese” en reclamar a xestión da infraestrutura para Galiza.

Ethel Vázquez, versus delegada da concesionaria da AP-9

Por outra parte, a parlamentaria do BNG tilda de “lamentable” que a conselleira de Infraestruturas, Ethel Vázquez afirme nunha entrevista que o debate sobre a vía de conexión do Eixe Atlántico non debe centrarse no prezo da peaxe senón no servizo que presta. A xuízo da nacionalista, “a conselleira parece a delegada da concesionaria” e lembra que o propio Ministerio de Fomento sitúa a AP-9 entre as autoestradas “máis caras do Estado”.

Ana Pontón salienta que o BNG rexistrou no Parlamento o 3-12-2015 unha Moción pola que insta a Xunta de Galiza a reclamar do goberno do Estado que nas peaxes de 2016 se aplique unha redución na AP-9 e AP 53 nun 50%, repoñer o conxunto de traballadores/as suprimidos nos últimos anos, garantir como mínimo, unha cabina con cobro manual en todas as peaxes da AP-9 e AP 53 e elaborar un estudo sobre a “situación xurídica” da AP-9 co obxectivo de rescatar a concesión para a xestión pública.