O BNG denuncia os obstáculos do Concello de Santiago á manifestación de Queremos Galego
Impoñer unha fianza a unha plataforma cidadá en defensa da lingua galega por causas derivadas da súa organización, como é a instalación dun palco, vai contra as liberdades fundamentais do dereito á manifestación, explicou o edil nacionalista.
O concelleiro do BNG lembra tamén que xa advertira no Pleno en que se aprobou a ordenanza de ocupación de vía pública que, ao deixar aberta a posibilidade de pedir fianza para actividades sen ánimo de lucro, podería dar lugar a estas situacións. O Goberno do PP de Santiago trata de poñer impedimentos á celebración de eventos de promoción da lingua galega e iso vai contra a propia normativa que se aplica aos cargos públicos, indicou.
Rafael Vilar demandou, así mesmo, que o alcalde rectifique e retire a fianza imposta a Queremos Galego, así como a outros eventos de semellantes características que se vaian organizar no futuro na nosa cidade. Santiago de Compostela, como capital de Galiza, debe ser lugar de encontro e epicentro da reivindicación da nosa lingua e da nosa cultura, ao contrario do que fai o PP que pretende cohibir e buscar enfrontamentos coa cidadanía con estas accións antidemocráticas, engadiu.