O BNG demanda ao Goberno Central que free a discriminación de prezos ao sector lácteo galego
Davila lembra que o sector lácteo galego atravasa unha grave crise que se agrava pola suba dos custos de produción e o diferencial de prezo.
Así, dende o ano 2005 mentres os ingresos dos gandeiros galegos pola venda de leite medraron un 0,9% os custos de explotación fixérono nun 29,6%, co que a súa renda caiu nun 43%.
O prezo do leite en Galiza, o máis baixo do Estado e da Unión Europea
E isto está provocado en boa medida porque o prezo que reciben os gandeiros galegos é dos máis baixos da Unión Europea e o máis baixo do Estado español: un 5,5% menos que a media estatal, un 5,48% inferior ao de Portugal, un 1,10% inferior ao de Francia, un 5,65% ao de Alemaña e un 12,16% inferior ao de Holanda.
O goberno da Xunta de Galiza tamén ten responsabilidades
A deputada do BNG afirma que a Xunta de Galiza non está exenta de responsabilidades nesta crise. Lembra que Galiza conta co 40% da produción láctea do Estado e co 50% dos produtores e produtoras polo que o Goberno galego debería liderar a defensa do sector no Estado en lugar de dedicarse, como fixo nos últimos anos, a eliminar importantes instrumentos dos que o Goberno anterior da Xunta -participado polo BNG- se dotara para defender o sector e que deron importantes resultados.
Ante esta situación, a deputada nacionalista demándalle aos ministerios de Agricultura e Economía que non permitan que a distribución francesa e alemá actúe de xeito que favoreza a discriminación de prezos das empresas sobre o leite galego.
Tamén solicita a parlamentaria do BNG que o Goberno formule con urxencia as modificacións normativas que aseguren a aplicación axeitada dos contratos no sector lácteo.