O BNG agradece a contribución económica da súa militancia para garantir a súa viabilidade
A Secretaria de comunicación, Carme Adán denuncia que mentres outros partidos son financiados de maneira opaca e con sobres, o BNG conta co esforzo e colaboración da súa militancia nun momento de profunda crise económica para garantir a súa viabilidade e continuar defendendo os intereses de Galiza
Carme Adán agradeceu hoxe, en sede parlamentar ante os medios de comunicación, a contribución económica da militancia do Bloque Nacionalista galego para garantir a súa viabilidade.
A deputada asegurou que o BNG síntese orgulloso do esforzo de toda a militancia nun momento de profunda crise económica agravado polos recortes do Partido popular nos fondos públicos para os partidos políticos e todo o relacionado coa democracia.
A parlamentaria nacionalista manifestou que, mentres outras forzas son financiadas de maneira opaca e a través de sobres, o BNG agradece o grande esforzo e contribución económica da súa militancia neste momento de crise para continuar defendendo os intereses de Galiza.
Adán lembrou que o Consello Nacional do BNG acordou solicitar a contribución económica voluntaria da militancia de maneira extraordinaria como forma lexitima de autofinanciamento e adaptando esta contribución ás diferentes posibilidades persoais.
A deputada do BNG reiterou o compromiso e colaboración de toda a militancia para autofinanciar a actividade política desta forza e garantir a viabilidade económica do BNG.