O BNG acada o apoio para demandar unha solución xusta para os afectados dos bonos do Banco Popular
O portavoz parlamentario do BNG , Francisco Jorquera defendeu unha proposición non de lei instando á Xunta a demandar do Goberno central, a Comisión Nacional de valores e o Banco de España unha solución que garanta a restitución da totalidade do diñeiro investido polos afectados da mala comercialización de bonos convertibles do Banco popular.
O portavoz parlamentario do BNG, Francisco Jorquera explicou que a emisión de bonos convertibles, por parte do Banco popular son un novo exemplo das prácticas de casino financeiro, nas que incorreu a banca española polo que instou á Xunta a demandar do Goberno central, a Comisión Nacional de Valores e Banco de España unha solución que garanta a restitución da totalidade do diñeiro investido polos afectados da mala comercialización deste produto.
Aprobada por unanimidade a proposición non de lei do BNG
A proposición non de lei nacionalista foi aprobada por unanimidade na Comisión de Economía celebrada hoxe no Parlamento. O deputado agradeceu o apoio de todos os grupos parlamentarios e manifestou o seu desexo de iniciar canto antes as xestións ante o Goberno central na procura dunha solución xusta para os afectados. agardamos, dixo, que a iniciativa que hoxe aprobamos non se converta nun brinde ao sol e as persoas vítimas da mala comercialización de produtos financeiros poidan recuperar a totalidade dos cartos investidos.
Na súa intervención, o deputado aproveitou para lembrar que aínda existen 10.000 aforradores galegos afectados pola estafa das preferentes e fican 100 millóns de euros sen por devolver.
Sobre os bonos do Banco Popular explicou que en Galiza son 1.500 pequenos aforradores con máis de 40 M investidos neste produto financeiro E tratase, na maioría dos casos de persoas cun perfil moi semellante o das vítimas da estafa das participación preferentes, persoas maiores, aforradoras e non investidoras, sen formación en produtos complexos nin información completa e veraz sobre as características do produto que adquirían.
Jorquera explicou que tras varios vencementos do produto, os afectados enfróntase á perda da maior parte dos seus aforros dado que o prezo da conversión da acción está fixado en 17,61 euros cando a súa cotización non alcanza aos 3,33 euros o que implica unha perda do capital inicial do 80% que segundo o Banco, descontados os intereses cobrados quedaría arredor do 35%. O Banco propón nese momento unha nova fuxida cara adiante pedíndolle ao clientes que fagan un novo depósito a prazo fixo de catro a cinco anos ofertándolle un interese entre o o 2% e o 5% así como modificacións nas condicións dos prestamos e hipotecas, solución que en ningún caso garanten a recuperación do diñeiro investido.
O Banco Popular, engadiu Jorquera, en troques de ofertar unha solución aos clientes oferta unha solución para si mesmo sorteando os problemas que a mala comercialización dos bonos poida acarrear.
O deputado do BNG concluíu afirmando que é de xustiza que as adminsitración públicas se impliquen á hora de procurar unha solución xusta que evite a perda dos aforros a un importante número de pequenos aforradores do noso país. A inciativa nacionalista aprobada hoxe por unanimidade no Parlamento galego vai nesa dirección.