Ana Pontón e Gabriel Rufián defenden o diálogo político e a negociación fronte á bronca das dereitas de Colón

Dereitos, liberdade, democracia enunciaba o coloquio que hoxe mantiveron en Santiago a portavoz nacional do BNG, Ana Pontón, e o portavoz no Congreso de Esquerra Republicana, Gabriel Rufián, poñendo en valor o papel das forzas nacionalistas de esquerda a favor do diálogo e da negociación mentres que, a mesma hora, as dereitas se manifestaban na Praza de Colón na dirección contraria.

“Hai dúas imaxes, a de quen está na Praza de Colón manifestándose de ganchete da extrema dereita machista, racista, xenófoba e claramente antigalega e a das que  estamos aquí para falar de liberdade, de futuro, de como saír do bucle da crispación apostando polo diálogo e pola negociación política para darlle solucións ás demandas da cidadanía”, explicou Pontón, “dúas imaxes: a dos que están no follón, na bronca e  alimentan unha espiral que fuxe da realidade e a das que estamos polo diálogo e as solucións pactadas”, sintetizou.

Tras reiterar a posición do Bloque a favor dos indultos, “porque un conflito político debe ter unha solución política”, Pontón denunciou as consecuencias dun centralismo exacerbado, -que denominou madricentrismo-, “que cada vez máis é percibido como lastre non só para construír un proxecto vital en Galiza senón tamén para a maioría social do Estado” porque, subliñou, “a concentración de poder político, económico e mediático en Madrid é útil para os do IBEX 35 pero deixa tirada á maioría social”.

E puxo como exemplo o espolio da  riqueza eléctrica “mentres se impón unha factura da luz que é unha estafa”, ou como ese centralismo madrileño “é un problema para o reparto de oportunidades que permitan ter proxectos vitais de futuro con emprego, vivenda, emancipación. Hai que romper con esa aspiradora de recursos e as forzas nacionalistas estamos tamén xogando ese papel a favor das maiorías sociais”.

Neste contexto, Pontón fixo fincapé na “importancia” de que a xente moza “se implique cada vez máis na participación política, tendo en conta que son varias as xeracións de mozxs que se senten estafadxs”. Ao que se suma o feito da emigración como elemento específico de Galiza: “a proba do fracaso das políticas da dereita e do centralismo e a emigración da xente moza”, recalcou.

Por iso, Pontón indicou que a necesidade de cambios estruturais “non debe levar as forzas nacionalistas a renunciar a dar solucións aquí e agora, traballando no que afecta ao cada día e demostrar que somos a mellor alternativa para que a maioría social poida chegar a fin de mes, para que non se sinta estafada cada vez que paga a factura da luz ou para que a xente moza teña futuro aquí”.

 

De feito, argumentou, unha parte do avance social e electoral do Bloque está en que hai moitos galegos e galegas que, sen sentirse nacionalistas, “si ven no BNG a mellor alternativa para defender os seus intereses e mellorar a súa calidade de vida, en definitiva para gobernar Galiza”, explicou.

Derrogar as políticas da dereita

No coloquio, Pontón tamén fixo unha reflexión sobre as consecuencias de que desde a esquerda se practiquen políticas de dereitas, como sucede co Goberno autoproclamado  máis progresista da historia, “pero que incumpre os compromisos da investidura e aí segue a Lei mordaza, as contrarreformas laborais, unha  reforma fiscal xusta ou aceptar a realidade plurinacional”. Cando isto pasa, subliñou, “estase aboando o terreo para o avance da dereita e da extrema dereita”.

Unha extrema dereita coa que o PP de  Feixóo comparte propostas e programa. “Se lle quitas o punto macarra de VOX e vas ás políticas concretas, aquí temos en Feixóo un precursor: financia organizacións que están en contra do dereito das mulleres ao aborto, implanta o pin parental lingüístico, financia centros educativos que segregan por sexos e goberna para os grandes intereses económicos. Se quitas o ton macarra, insisto, aquí o PP comparte discurso coa extrema dereita porque ao fin esta non deixa de ser unha escisión”.

Nacionalismo, motor de cambio a favor das maiorías

O nacionalismo de esquerdas indicou Pontón, é motor de cambio a favor das maiorías sociais, “pero non podemos falar de dereitos en abstracto, senón tamén ter alternativas que aporten solucións no concreto, e hoxe a cuestión que sigue sobre a mesa como asunto urxente que resolver que é como darlle un emprego digno á xente que vive na Galiza, en Catalunya, en Madrid ou en calquera lugar do planeta”, indico, “unha prioridade que hai que atender.

Pese a que o centralismo  tamén afecta ao ámbito mediático, non logra silencia que Galiza lidera debates como a loita contra “os pozos negros do Franquismo”, cunha sentenza histórica no caso do Pazo de Meirás.

“Desde as diferencias de cada forza política e de cada nación, hai moitas cuestións que unen a Galiza, Catalunya e Euskadi e temos o reto, no que queda de lexislatura, de que se logren aquelas demandas que puxemos na investidura  como a derrogación da Lei mordaza, das contrarreformas laborais ou camiñar cara unha realidade plurinacional que como forzas nacionalistas representamos”.

“Colaborar vai ser bo para Galiza e para o conxunto do Estado, porque os debates que están propoñendo os nacionalismos galego, catalán e vasco, -coas súas particularidades-, representa unha alternativa social fronte a forzas estatais moi apegados aos poderes fácticos e moi desapegados da realidade da xente do común”, concluíu Pontón un debate moderado polo politólogo galego-catalán, Silvio Falcón.