Resposta institucional desde os concellos e mobilización social contra as políticas regresivas do PP
O rodillo implacable que o PP aplica no Congreso e no Parlamento galego imposibilita que prospere calquera iniciativa para mudar a política de recortes e a fiscalidade regresiva que os populares impoñen á cidadanía. Por iso, o BNG mira cara os concellos e propón enfrontar esas políticas desde os gobernos municipais, impulsando o que bautizou como espírito de Riotorto.
Queremos lanzar un gran movemento de resposta institucional e social con tres obxectivos concretos: facer fronte á política de recortes do PP, facer fronte á política fiscal regresiva que grava ás rendas máis modestas e facer fronte á reforma local impulsada polo PP, que implica recortar e privatizar servizos que agora prestan os concellos, explicou o portavoz nacional do BNG, Xavier Vence.
Nisto consiste o que denominamos espírito de Riotorto, que vai moito máis aló de rexeitar o copago de medicamentos, salientou.
A resposta institucional se articula desde os concellos gobernados polo BNG, -pero confía en que sexa seguida por todos os municipios galegos-, con propostas concretas para minimizar o impacto dos recortes. Con ese obxectivo, explicou Vence, están a elaborar os orzamentos de 2014 en función das dispoñibilidades presupostarias e das necesidades en cada caso.
Asumir o copago, subvencionar os comedores escolares, crear bolsas de alimentos, facilitar vivenda ás familias desafiuzadas, son algún exemplos da política alternativa do BNG nos municipios.
É posible gobernar doutra maneira para saír da crise, elixindo defender á xente como fai o BNG nos concellos nos que goberna con alternativas ás políticas da Xunta que se centran en penalizar aos colectivos con máis dificultades: parados, pensionistas, doentes, estudantes, recalcou.
En canto á resposta social, Vence explicou que o BNG celebra este venres un cumio municipal para facer visible a alternativa nacionalista nos concellos, e tamén ten convocado concentracións diante das deputacións o vindeiro 14 de novembro contra a reforma local.
Igualmente, dentro desta resposta social, o Bloque apoia e participará nas mobilizacións impulsadas polos 150 colectivos convocados en Riotorto contra o repagamento, en concreto as concentracións do dia 8 ante os hospitais galegos de referencia e a manifestación nacional do 17 de novembro por unha sanidade pública, universal e gratuita.
Moción contra o espolio
O portavoz nacional anunciou que o BNG vai presentar unha moción en todos os concellos galegos para pedir a paralización do proceso de venda de NGB, que supón unha auténtico latrocinio do aforro galego, e que terá unha especial repercusión nos concellos do medio rural. O espolio da entidade pode provocar exclusión financeira para moitos galegos e galegas se desaparecen as oficinas nas que xestionan as súas pensións, salarios ou aforros, argumentou Vence.