Jorquera pide a dimisión de Feijóo polas súas relacións cun "capo da mafia do narcotráfico"

O portavoz do grupo parlamentario do BNG cualificou de “feito de extrema gravidade” as relacións do Presidente da Xunta co “capo da mafia do narcotráfico” Marcial Dorado

Francisco Jorquera reclamou hoxe a “dimisión inmediata” do Presidente da Xunta de Galiza ante as informacións que o relacionan co “capo da mafia” do narcotráfico en Galiza, Marcial Dorado.

“Núñez Feijóo era daquela o mesmo de hoxe”, dixo Jorquera que ademais criticou o comunicado emitido polo Partido popular , “Feijóo nese momento ocupaba xa altos cargos dos Gobernos do Partido popular” e era “vox populi” a implicación de Marcial Dorado coa mafia do contrabando, explicou o nacionalista.

Jorquera lembrou que Marcial Dorado fora detido en dúas ocasións e obxecto dunha investigación internacional sobre a súa presunta implicación no “branqueo de diñeiro a gran escala” e manifestou as explicacións do propio Feijóo e o comunicado do Partido popular son “inverosímiles” ao negar a “ estreita relación” entre o Presidente da Xunta, Marcial Dorado e o testaferro do narcotraficante que ocupaba un cargo de confianza na Xunta de Galiza.

Asemade, “Feijóo e Dorado realizaron diversas viaxes a Andorra” lugar no que Marcial Dorado “branqueaba diñeiro”.

O deputado do BNG asegurou que resulta estraño que o Presidente da Xunta, neses anos, non escoitara falar da “Operación Nécora” ou da “presunta implicación de Marcial Dorado na trama do contrabando e do narcotráfico”.

O BNG pide a dimisión de Feijóo

Núñez Feijóo durante a campaña electoral do 2009, demandou a dimisión do vicepresidente da Xunta, Anxo Quintana, trala publicación dunha foto nun iate co empresario Jacinto Rey. “Falamos de relacións con persoas sobre as que non existe a máis mínima dúbida da súa honorabilidade", afirmou Jorquera e engadiu que os feitos "non son en absoluto comparables".

O deputado fixo referencia ás declaracións do Presidente da Xunta nas que afirmaba que “un Goberno debe coidarse das malas compañías” polo que o nacionalista pediu que “predique co exemplo”.

Nunha cultura democrática asentada, reiterou, “relacións persoais con capos da mafia non poden ter outra resposta que a dimisión inmediata”.

Comparecencia na Cámara galega

O portavoz do grupo parlamentario reclamou a “comparecencia” do Presidente da Xunta de Galiza na Cámara galega e anunciou que o BNG rexistrará diferentes iniciativas parlamentares para interpelar a Núñez Feijóo sobre esta cuestión.

Jorquera concluíu asegurando que para frear o deterioro da imaxe da política galega e rexenerar a democracia é necesario tomar medidas exemplarizantes comezando pola “dimisión de Núñez Feijóo”