A TVG comprométese co BNG a dar cobertura ás seleccións galegas no mundial de Fútbol en Abu Dhabi

Montse Prado salientou que é un “orgullo” para Galiza que as seleccións galegas, femenina e masculina, participen no evento mundial previsto entre os días 5 e 8 de marzo nos Emiratos Árabes e congratulouse do compromiso do director da CRTVG de ofrecer a cobertura informativa do envento

A deputada do BNG, Montse Prado, a través dunha pregunta formulada na comisión de control da CRTVG reclamou a emisión dos encontros nos que participarán as “seleccións galegas de Fútbol gaélico” no Mundial de Fútbol en Abu Dhabi entre os días 5 e 8 de marzo.

A parlamentaria manifestou que a participación das seleccións galegas no encontro de Abu Dhabi contribúe a dignificar e normalizar a existencia de “seleccións propias en Galiza”.

Pola súa parte Sánchez Izquierdo comprometeuse á unha ampla “cobertura informativa na TVG” aínda que as condición económicas, dixo, non lle permitan, polo momento, confirmar se o medio público galego asistirá ao avento.

O BNG denuncia a manipulación informativa na TVG

Na comisión de control da Compañía de CRTVG, a deputada tamén criticou a manipulación informativa que, na súa opinión está a provocar que “moita xente deserte da TVG”.

A parlamentaria referíase á cobertura das eleccións sindicais do día 4 de novembro no ensino público non universitario de Galiza que apenas tivo repercusión na TVG. Sánchez Izquierdo xustificou a brevidade da noticia polo propio formato do informativo que conleva ese “tratamento habitual” nos casos como o nomeado pola parlamentaria.

Prado lamentou ese “habitual proceder informativo” e denunciou que baixo esa escusa as organizacións sindicais e o nacionalismo “apenas aparecen como noticias relevantes”.

A publicidade na TVG maioritariamente en castelán

Por outra parte, a deputada tamén preguntou pola porcentaxe de uso da lingua galega nos espazos publicitarios da Radio e Televisión e as medidas adoptadas para incrementar a presenza do galego na publicidade.

Os espazos publicitarios, explicou, ocupan un gran tramo da programación da TVG así como na súa páxina web. A nosa preocupación ven xustificada porque unha parte importantísima da información publicitaria faise “en castelán” e páxina web é “non cen por cen”.

Dende que o Partido popular volveu á Xunta, a información galega deixou de ser “o eixo central da comunicación” e a publicidade cada vez faise máis en castelán algo que “non é casual nin se xustifica razóns técnicas”. Esta circunstancia, engadiu, é calculada porque tamén son calculados “os usos lingüísticos por parte dos medios públicos para restar relevancia a lingua galega”.

A deputada apelou á Lei de creación da Radio Televisión de Galiza e o mandato da “proxección, promoción e difusión da lingua galega” para pedir unha rectificación e que a TVG deixe de emitir publicidade en castelán.