Rosana Pérez pide a retirada da reforma do sistema de concesión de bolsas de Wert

A deputada do BNG no Congreso, Rosana Pérez, presentou varias iniciativas parlamentares na Cámara, unha proposición non de lei e unha pregunta, para demandar ao Ministro de Educación que dea marcha atrás na súa proposta de reforma do sistema de concesión de bolsas e axudas ao estudo.

Rosana Pérez alude á polémica xerada a raiz polo borrador de Real Decreto do Ministerio de Educación sobre as axudas ao estudo, criticada polas CC.AA, incluidas algunhas gobernadas polo PP, e onte polos reitores da universidades na liña de que atenta contra a igualdade de oportunidades.

Cada vez máis dificuldades para garantir os estudos aos máis desfavorecidos

Precisamente, esa é unha das principais críticas que a deputada do BNG, Rosana Pérez, realiza nas súas iniciativas parlamentares. “Entre as funcións do Ministerio de Educación, concretadas na súa web, figura o “fomento da igualdade de oportunidades no acceso á educación e a promoción das políticas de igualdade, non discriminación e accesibilidade universal”.

Porén, subliña Rosana Pérez, “a reforma das bolsas que propugna o Ministro vai na dirección contraria”. Critica a deputada do BNG a intención de reducir de xeito considerábel a cantidade á que teñen dereito os beneficiarios e beneficiarias. Afirma que a intención de introducir un complemento de carácter variábel que vai depender do nivel de renda, do rendemento e do orzamentos disponíbel por parte do Goberno, vai provocar unha grande incerteza entre o alunado que non saberá a contía que pode cobrar.

Esa “parte variábel, converterá as bolsas en algo descoñecido”. Ademáis, reprocha a Wert que poña máis dificuldades para poder acceder a unha axuda, o que “supón un paso máis na dirección de recortar as axudas, e sobre todo, un golpe á igualdade de oportunidades porque as bolsas deberían servir para posibilitar que alunos e alunas de familias con piores condicións económicas poidan acceder aos estudos e garantir a súa continuidade”.

Rosana Pérez insta ao Ministro “a cambiar o paso, e aumentar as partidas destinadas a bolsas e axudas ao estudo, máis necesarias que nunca debido ao duro contexto de crise económica e ás dificuldades de moitas familias para custear os estudos dos seus fillos e fillas”.

No concreto, a parlamentar nacionalista demanda que se elimine a pretensión de introducir un complemento con carácter variábel.