O PP non apoia que a cidade de Vigo acolla no 2016 a Feira Mundial da Pesca

 Carme Adán solicitaba na iniciativa un compromiso do Goberno galego para “garantir” a celebración da World Fishing Exhibition en Vigo, tras a súa cancelación no ano 2015

Os votos desfavorables do Partido popular impediron que prosperara na Comisión de Pesca, que se está a celebrar no Parlamento galego, unha iniciativa do BNG ao fin de garantir que a Feira Mundial de Pesca se celebre en Vigo no ano 2016.

Na súa intervención, Adán lembrou que a pesar de ser unha Feira organizada dende a iniciativa privada, a World Fishing Exhibition sempre contou coa colaboración das administracións públicas, “agora vostedes votan en contra de garantir a súa celebración” dixo sorprendida a deputada nacionalista tras anunciar o portavoz popular unha emenda co fin de substituír o termo “garantir por colaborar”.

Na quenda de resposta, a nacionalista cualificou de “inaudito” que nun país normal o seu Presidente acepte perder a posibilidade de realizar unha Feira Mundial de Pesca sabendo o que significa para a economía e o desenvolvemento do sector un evento destas características, “constata a súa desafección co país que goberna” afirmou a deputada.

“O Goberno galego, dixo, xa non demostra seguera inacción, o que demostra é unha jetada tremenda” e máis por amparase en que a Feira é unha cuestión que atinxe só as empresas que a organizan como se este encontro mundial na cidade de Vigo “non fora con él”.

Adan reprochou ao portavoz do PP, Xosé Manuel Balseiro votar en contra dunha iniciativa que reclamaba a celebración do cumio de Ministros de Pesca como se celebrou noutras ocasións, “agora vostedes van converter Galiza en algo residual porque non lles interesa este País nin a nosa proxección fora del”.

A deputada afirmou que o texto defendido polo BNG era de “mínimos” para pedir a colaboración do Goberno galego, Ministerio e o Concello de Vigo co Comité Executivo para que no ano 2016 se poida celebrar a Feira Mundial da Pesca en Galiza.