Montse Prado: "A atención Primaria a máis prexudicada da política sanitaria do PP"

Prado lamenta que a atención dun neno de Ourense no Sergas dependa “dunha carta dos reis magos”

O BNG denunciou na Comisión parlamentaria de Sanidade que a atención primaria é a “principal damnificada” pola política sanitaria impulsada pola Xunta “que converte a saúde en negocio para o sector privado”. Como dato, a deputada Montse Prado subliñou que, desde que Feijóo preside o Executivo galego, houbo unha caída de recursos de 300 millóns de euros só nesta área.

“Só o voluntarismo dos profesionais están salvando a sanidade galega da desfeita total”, indicou Prado, quen advertiu que a caída de orzamento, a diminución de persoal sanitario e o deterioro continuado das infraestruturas están provocando unha situación de “emerxencia” na atención primaria. “Entre a propaganda da Consellería e a análise que transmite a maioría da comunidade sanitaria, tanto o persoal como os doentes, eu quédome coa realidade”, alegou.

Na comparecencia ante o director xeral de Asistencia Sanitaria do Sergas, Felix Ruibal, Prado expresou o seu “estupor” e “vergoña” tras comprobar que para que un neno galego con problemas de crecemento sexa atendido no sistema público de saúde foi preciso a intervención da Casa Real.

“Manifestamos o noso apoio á familia de Ismael por non renderse, pero tamén a nosa incredulidade ao constatar que fixo falta unha carta dos reis magos para que este neno recibise no sistema público de saúde do Sergas a atención sanitaria que precisa para o seu problema de crecemento”, explicou Prado.

A deputada, que lamentou as “mentiras” da conselleira de Sanidade, Rocio Mosquera, neste asunto, subliñou que todos os galegos e galegas deben ter garantida unha sanidade pública de calidade, e advertiu que as políticas do PP camiñan na dirección contraria.