Davila pide reforzar o Fogasa para rematar co atasco que prexudica a miles de traballador@s

A portavoz do BNG no Congreso, Olaia Fernández Davila, presentou unha proposición non de lei e unha iniciativa parlamentar na Cámara para instar ao Ministerio de Emprego a reforzar a plantilla do FOGASA para solucionar o grave problema de acumulación de expedientes sin tramitar que está a prexudicar a miles de traballadores e traballadoras con salarios pendentes de cobro.

Davila explica que a 31 de marzo, o Fondo de Garantía Salarial (Fogasa) acumulaba máis de 13.814 expedientes sen tramitar na Galiza. “Uns expedientes que afectan a 20.997 traballadores”. No conxunto do estado, puntualiza, contabilízanse 201.673 expedientes pendentes e 306.542 afectados.

Un problema que se arrastra desde hai tempo

Sinala a portavoz do BNG que “non é a primeira vez que o BNG se dirixe ao Ministerio de Emprego por este tema que se tería que ter resolto hai meses porque mantén en vilo a miles de traballadores e traballadoras que viven con angustia a súa situación”. Davila responsabiliza ao Ministerio do enorme retraso no pagamento das prestacións pendentes de cobro por non querer aumentar os recursos humanos do Fogosa e rematar co atasco existente.

“Dado que non estamos ante un problema novo, preguntámonos como é posíbel que o Goberno non adoptara medidas urxentes para solucionar un atasco que ten graves consecuencias sobre a situación económica de miles de traballadores”.

Olaia Fernández Davila critica a política de aforro “obsesivo do Goberno que leva a situacións lamentábeis a miles de persoas”.