As cotas da UE obrigan á frota galega "a tirar o noso futuro pola borda"

O portavoz de pesca do BNG, Daniel Rodas denuncia a “indefensión” de Galiza ante a Unión Europea

O portavoz de Pesca do BNG, Daniel Rodas afirma que a UE impón unha cota abusiva á flota galega en “conivencia co Estado español e a Xunta de Galiza”.

Para o deputado do BNG, as cotas impostas pola Unión europea “discriminan a Galiza mentres flotas de arrastreiros doutras nacionalidades pescan cabala con total normalidade na nosa propia costa, descárgana nos portos galegos e véndena nos nosos mercados”.

Rodas afirma que esta circunstancia, só é posible pola falta de “peso político galego” nas negociacións das cotas, a pesar de que a captura de cabala resulta fundamental para a nosa economía, “necesitamos, voz propia para reclamar un novo reparto do actual banco de cabala” asegura Rodas.

Neste sentido, e parafraseando ao escritor e actor galego, Roberto Vidal Bolaño, o nacionalista denunciou que “estamos fartos da autocastración” que nos impón o Partido popular.

O parlamentario do BNG reclama que o reparto de cotas sexa en función de criterios socioeconómicos co fin de garantir a pesca artesanal durante toda a campaña para consolidar o emprego, soster as comunidades costeira e defender a supervivencia do sector.

O BNG, a través do vídeo e o documento informativo baixo o lema “xestionemos a nosa pesca e gobernemos o noso mar” inicia unha campaña contra os desequilibrios “catastróficos” que provocan as cotas pesqueiras do ano 2013 para a flota artesanal galega.