O BNG pide poñer en marcha o Consello de informativos da CRTVG

Montse Prado reclamaba  da dirección da CRTVG aprobar e aplicar o Estatuto profesional dos medios públicos de comunicación audiovisual de Galiza , no prazo de tres meses, e crear o Consello de informativos

A deputada  defendeu hoxe unha Proposición non de lei ao fin de poñer en marcha, no prazo de tres meses, o Estatuto profesional dos medios públicos de comunicación audivisual de Galiza e crear o Consello de informativos.

Na defensa da proposta nacionalista, a deputada asegurou que os medios de comunicación de titularidade pública deben garantir á cidadanía o seu dereito á “información obxectiva, veraz e imparcial” exercicio dixo, que na actualidade a Televisión e Radio galegas non cumpren.

Traballador@s da RTVG denuncian manipulación e presións do Partido popular na elaboración da información

Neste sentido lembrou que no mes de xuño os comités de empresa da TVG e RG fixeron entrega de 345 sinaturas de traballador@s dirixidas ao Director Xeral da CRTVG, directoras da TVG e RG , Consello de Administración da CRTVG e grupos parlamentarios, escrito no que o colectivo de traballador@s denuncian a “manipulación informativa” e a demanda da creación do Estatuto Profesional e o Consello de Informativos.

Na defensa da proposta, Prado parafraseando ao grupo musical Siniestro total e a súa canción “matando hippies nas Cíes” afirmou que o Partido popular tenta converter a televisión e radio públicas nun sinistro total e “matar ou eliminar a presenza do discrepante nos medios públicos”.

A deputada aludiu ao grupo musical galego tras un comentario “procaz” do portavoz do Partido popular, Agustín Bahamonde dedicado a un deputado da oposición.

Canal Nou e a censura do Partido popular

A nacionalista tamén aludiu a manipulación de Canal Nou onde os informadores/as tiñan prohibido nomear termos como botella ou xamais, “o de botella, dixo, non sei por que será pero xamais lembraba ao Nunca Máis que hoxe levo na camiseta” e recalcou que o BNG seguirá defendendo a existencia dos medios de titularidade pública aínda que o Partido popular nolo poña moi díficil porque “a democracia e Galiza necesita deses medios”.

Hoxe traemos esta petición, dixo, porque os traballadores/as non toleraran “a manipulación informativa” e atrévense a poñer o seu nome nun escrito reivindicando un cambio.

“Defendemos unha radio e televisión pública que faga de Galiza o seu centro de comunicación e que non secundarice a información e a realidade galega”.

A deputada denunciou que na actualidade a RTVG non cumpren coa función que lle foi encomendada polo que reiterou a creación dun Consello de informativos como reclama o 60% da plantilla da radio e televisión galega.

O Partido popular anunciou o seu voto desfavorábel á iniciativa nacionalista.