O BNG pide a Educación que retire o novo decreto de comedores

Cosme Pombo respondeu ao Secretario xeral, Xesús Oitaven que a medida do PP “penaliza ás familias con rendas baixas” e supón “o repago” do servizo

O portavoz de educación do BNG defendeu hoxe, tras a comparecencia do Secretario xeral, Xesús Oitavén un ensino obrigatorio público e gratuíto e rexeitou o “recorte no servizo de comedores”.

Pombo lembrou que o Partido popular leva reducido miles de postos de traballo e unidades escolares, “os números son os que son”, sentenciou e aí están as reducións de profesores, bolsas para libros, axudas á normalización lingüística...

O parlamentario do BNG, respondeu ao Secretario xeral que unha gran parte do alumnado que non pagaba o servizo do comedor, agora deberá abonalo e cómo mínimo, dixo, serán 20.000 familias.

Para o nacionalista, a medida do Partido popular supón un aumento do “40 por cento do prezo público para o comedor” polo que pediu a retirada dun Decreto dos máis contestados socialmente polas graves consecuencias que provoca nas familias con ingresos cada vez “máis minguados” por mor da crise económica.

 Pagará o mesmo a familia  que ingrese 9.000 euros ou 90.000 ao ano

 Asemade denuncio o “paripé” do Goberno con todos os representantes sindicais que se viron obrigados a abandonar a Mesa sectorial. O propio Consello Escolar, dixo, cualificou a medida de “vulneración do dereito á educación”, a Mesa galega pola Educación Rural posicionouse en contra e CONFAPA rexeitou o “repago dos comedores” asegurando que o Decreto do PP é “ insolidario e non reequilibrador”.

O BNG, afirmou, considera inxusto que “teñan que pagar familias con ingresos situados no limiar da pobreza” entre as que sitúo ás que perciben 7.000 euros ao ano, e os que ingresen 9.000 pagarán o mesmo que os que cobran 90.000. A medida, polo tanto, afirmou “non garante a atención aos máis necesitados do rural nin das cidades”.

O deputado do BNG negou as afirmacións do portavoz popular, Román Rodríguez que asegurou que a decisión do Partido popular non prexudicará nin ao alumnado nin as familias.

O nacionalista volveu pedir a retirada do Decreto que obriga ao pago do servizo de comedor escolar, redactar outro decreto que garanta o uso gratuíto para o alumnado transportado e para as familias cunha renda baixa, dotar os comedores de persoal especializado e a instalación de espazos para comedor na construción dos novos centros públicos, concluíu.