O BNG leva ao Parlamento a negativa do SERGAS a contratar a unha muller embarazada

A deputada nacionalista, Montse Prado cualifica de “discriminación laboral e sexismo” declarar “non apta” a unha celadora embarazada que xa informara desta circunstancia no momento de ser chamada para cubrir unha substitución

A deputada do BNG, Montse Prado rexistrou unha Proposición non de lei instando a Consellería de Sanidade a “rectificar” e iniciar as medidas necesarias para restituír os dereitos laborais dunha traballadora incluída nas listas de contratación do Sergas á que lle foi negado o contrato laboral  por estar embarazada, circunstancia, afirma a nacionalista, da que a traballadora informou cando se realizou o chamamento.

Prado explica que a traballadora acudiu a seu posto de traballo no Hospital de Vigo e no lugar de asignarlle as funcións de celadora foi derivada á unidade de riscos laborais onde foi declarada “non apta”. En troques de adecuar o seu posto de traballo a súa situación como establece a normativa, as responsábeis do centro non lle permitiron incorporarse ao traballo.

A parlamentaria denuncia as explicación “inaceptábeis” d@s responsábeis do Sergas amparándose nun informe sobre saúde e “protección da maternidade” e cualifica de “indignas” as declaracións da propia conselleira, Rocío Mosquera que afirmou : “ esa persoa, pola razón que sexa, non está en condicións de realizar o traballo e non se vai contratar, e tan sinxelo como iso, non se vai formalizar o contrato”.

Montse Prado censura estas declaracións que poñen de manifesto a “verdadeira faciana” da conselleira e “inhabilítana” para ser a titular da Consellería da Sanidade Pública galega