Vence e Sobral comparten co sector marisqueiro de Poio a demanda do saneamento integral da Ría
Na súa visita institucional ao Concello de Poio, mantivo un encontro cos representantes do marisqueo e dos produtores de mexillón, xunto co grupo de goberno municipal que lidera Luciano Sobral, que lles transmitiron a súa preocupación polos efectos que a contaminación está a provocar nestes sectores produtivos con varias zonas de extracción cualificadas como zona C.
O BNG demanda unha solución global, cun plan de investimentos nas infraestruturas de depuración necesario para completar, dunha vez por todas, o saneamento integral das Rías galegas, neste caso da Ría de Pontevedra, que vai máis aló dos problemas puntuais da parroquia de Raxó, subliñou Vence. O dirixente nacionalista fixo referencia aos millóns de euros de fondos europeos que ten recibido Galiza nos últimos anos para realizar as infraestruturas de depuración sen que se vexan resultados e, a día de hoxe, Galiza incumpre a normativa comunitaria en materia de saneamento.
Outro aspecto tratado na reunión co sector marisqueiro e mexilloeiro foi a etiquetaxe dos produtos. Vence anunciou que o Bloque seguirá a defender con iniciativas no Parlamento galego, no Congreso e tamén na Eurocámara unha etiquetaxe que informe ao consumidor da procedencia do produto, de tal xeito que quede perfectamente identificado se o mexillón ou a ameixa, por exemplo, veñen das rías galegas ou doutras latitudes, porque supón un elemento de enorme valor comercial para os nosos produtos polo seu prestixio e calidade, explicou.
Sobral, un referente
O portavoz nacional puxo en valor o traballo realizado polo goberno municipal do BNG no Concello de Poio que encabeza Luciano Sobral, exemplo dunha maneira de gobernar transparente, honesta, eficaz e a favor da veciñanza, en particular das persoas que están a padecer dunha maneira máis intensa as consecuencias da crise.
Vence salientou o traballo de toda a equipa, solvente e con experiencia, e aseguro que para o Bloque sería unha enorme satisfacción e orgullo que Luciano Sobral volvese encabezar a candidatura as municipais de maio. Estamos convencidos de que os veciños e veciñas volverían a dar un apoio maioritario a este alcalde porque son evidentes os logros da súa xestión municipal ao longo destes anos, indicou.