Vence sinala a recentralización e o espolio de NGB como as amezas para o futuro de Galiza
A vampirización centralista e a drenaxe do noso aforro son o nó gordiano que debemos desfacer para impulsar o desenvolvemento económico de Galiza e a nosa preservación como país, alegou Vence, ambos lastres exemplarizados na Reforma Administrativa que prepara o Goberno de Rajoy, auténtico libro gordo da recentralización, e na venda de NGB, cos ritmos e regras que lle interesan a Madrid.
Por contra, citou o exemplo de Catalunya que ten consolidado dous grandes bancos propios, -Sabadell e Caixabank- e agora un goberno de centro-dereita está creando un banco público. Por que alí si e aquí non? Porque esa dereita ten un proxecto de País e aquí Feijóo está entregada á estratexia centralizadora do PP, explicou.
A aposta do BNG é clara: banca pública galega para garantir financiamento a custes equiparables aos europeos as Pemes, porque non será o Santander nin a Caixa quenes financien as nosas empresas nin aos nosos sectores produtivos, alegou.
Igualmente, a proposta do Bloque inclúe unha tarifa eléctrica galega para garantir prezos da enerxía equiparábeis aos dos competidores, e unha fiscalidade como o imposto de sociedades que premien o investimento e a innovación. A formación nacionalista defende someter as finanzas á economía real, porque é a única capaz de xerar emprego, redistribuír a riqueza e manter servizos públicos de calidade.
Vigo, motor económico
O dirixente nacionalista subliñou a condición de Vigo como motor económico, pese a que non conte co apoio suficiente do Goberno central e da Xunta, como demostra que o Porto vigués non figure entre as infraestruturas principais da Rede Transeuropea de Transportes, como tampouco a Plataforma Loxística da Plisán, a incompentencia política de PP e PSOE na xestión do tax-lease que deixou ao sector naval vigués ao bordo do abismo, ou o abandono dun sector conserveiro que está no adn da cidade.
Sector naval
Ante unha nutrida representación política, económica e social,Vence subliñou que o Bloque non se resigna a que Galiza se quede sen tecido produtivo, e citou ao sector naval como exemplo das consecuencias de carecer dunha estratexia industrial.
O catecismo neoliberal di que non pode haber empresas públicas e logo empresas privadas acaban en mans de empresas públicas doutros países, como o caso do Barreras. Agardamos que o sector público mexicano se porte mellor co estaleiro e con Galiza do que o fixo o sector público español-madrileño, ironizou, para salientar que o BNG saúda a chegada de investidores se veñen coa intención de crear empresas na economía produtiva e de crear postos de traballo, argumentou.
Vence concluíu a súa intervención indicando que Galiza precisa poder político e financeiro e que, coa soberanía como faro, dixo, queremos todo o que ten un País normal.
Coloquio
Durante o turno de preguntas, o dirixente nacionalista salientou a importacia que ten acadar unha voz forte para Galiza en Bruxelas nos próximos comicios europeos, porque nós xogamos moito nesa cita electoral na que, reiterou, o BNG confía en poder conformar unha candidatura con todas as forzas nacionalistas de esquerda do país.
Vence defendeu o dereito de Catalunya a decidir sobre o seu futuro con valentía e enfrontando os obstáculos que se lle presentan desde a reacción do centralismo madrileño, e insistiu no interese estratexico que ten para Galiza un nacionalismo forte como o que representa o BNG.