Vence presume de modelo de goberno en Carballo e pon a Evencio como exemplo de alcalde nacionalista honesto, traballador, coa xente
Confía en que o 24M outros concellos da comarca se sumen á alternativa BNG-Asembleas Abertas como xa fixo tamén Zas e Vimianzo
O que precisa Galiza é romper con todo o que significa o PP o 24M, replica a Feijóo
Evencio demostrou en Carballo que os concellos poden dar servizos de calidade, demostrou que se pode colaborar man a man coas empresas para xerar oportunidades de traballo no concello, cuns obradoiros de formación adaptados á economía local, demostrou que se pode converter un concello cuxo único mérito era se cabeceira de comarca, nun referente cultural en Galiza, argumentou Vence.
O BNG foi capaz en apenas unha década incluso de mudar a cara urbanística de Carballo e, os que coñecedes ben este concello, sabedes que non era tarefa fácil. Desde logo, Evencio é moito máis que un alcalde entregado, é un mago, proclamou. Non teño ningunha dúbida de que a candidatura de BNG-Asembleas Abertas volverá obter un gran apoio dos veciños e veciñas de Carballo, porque ninguén quere renunciar a avanzar e a ter un concello mellor.
O 24 de maio, explicou o dirixente nacionalista, é o primeiro paso para romper con todo o que significa o PP de Feijóo, para pasar a páxina negra dos recortes, do acoso e derribo aos servizos públicos, pasar a páxina da privatización de servizos básicos que, ademais, son o principal foco da corrupción do Partido Popular. Temos a oportunidade de empezar a derrota do PP o próximo domingo, e estou seguro de que unha maioría de galegos e galegas optarán pola alternativa do BNG, concluíu.