Tereixa Paz: "A situación dos gandeiros galegos é inaguantable"
A deputada asegurou que os gandeiros non sacan os tractores a rúa por vicio, sácannos por desesperación
A parlamentaria do BNG, Tereixa Paz afirmou hoxe que o sector lácteo galego vive unha situación inaguantable e negou que os gandeiros estean a percibir os 300 euros prometidos no contrato asinado en Madrid.
Tereixa Paz respondeu á directora xeral da Consellería de Medio Rural que os gandeiros galegos non sacan a rúa os tractores por vicio, fano por desesperación ante o engano do Goberno. A parlamentaria criticou que a directora xeral comparara a situación galega con outras comunidades autónomas. Se eu fora gandeira, dixo, sentiríame desolada ante as súas manifestacións afirmando que o están facendo magnificamente ben cando en realidade, o que perciben as explotacións é que tres meses despois do acordo de Madrid, no mellor dos casos, logrou subir un céntimo e seguen perdendo sete u oito céntimos por cada litro de leite.
Paz recriminou que o Goberno galego, unha vez máis, deixara tirados aos gandeiros preocupándose máis de convencer ao resto dos galegos de que está facendo algo pola agónica situación do sector lácteo galego. A deputada destacou que o contido sobre o contrato homologado, asinado onte en Madrid, son oito folios de palabras ocas e se compromiso.
Finalmente lamentou que ante o grave problema polo que están a pasar as explotacións galegas a Xunta asuma sen rechistar os ditados de Madrid e Bruxelas, para isto dixo, se o PP permite que gobernen os mercados para que queremos eleccións.