Tereixa Paz: A ministra Bañez é unha ignorante ou unha manipuladora"
A deputada reclamou hoxe no Parlamento que os emigrantes retornados sexan tratados con xustiza e de forma igual ao resto dos pensionistas
A parlamentaria do BNG, Tereixa Paz iniciou a súa intervención denunciando o intento de manipulación do Goberno do PP co colectivo de emigrantes retornados e reclamou que se modifique a lei para que tributen igual que o resto dos cidadáns.
Tereixa Paz afeou as palabras da Ministra de Traballo da que dixo, ou ben é unha ignorante ou ben estúpida e manipuladora por afirmar onte no Congreso que o Goberno central modificou a lei do IRPF para beneficiar os retornados. Paz lembrou que o único que fixo o Goberno foi recoñecer a utilización irregular e abusiva da lei polo que serán devoltas as cantidades derivadas das sancións.
Asemade, remarcou que afectados que aínda non abonaron o IRPF están obrigad@s a facelo nos vindeiros seis meses e con carácter retroactivo e coa mesma lei que na actualidade os discrimina.
Tras a intervención do deputado popular, Hipólito Fariñas que acusou ao BNG de manipular aos retornados a nacionalista explicou que a única que manipula é a Ministra Báñez que pretende meter gato por lebre, acusación que estendeu ao propio Partido popular que vai na mesma dirección ante a proximidade das eleccións.
O PP non regala nada e todo o que se leva conseguido para retirar as sancións é produto exclusivamente das protestas dos miles de retornad@s que levan ano e medio mobilizándose para que non pisen os seus dereitos, afirmou.
A deputada lamentou que, unha vez máis, o Partido popular dea as costas a este colectivo votando en contra da proposta nacionalista baixo a escusa de que todo o mundo debe pagar impostos ao que Paz replicou, dende o BNG defendemos que todo o mundo pague segundo as súas posibilidades, pero se se fan amnistías fiscais para os ricos porque non para os traballadores?, concluíu.