Rosana Pérez critica ao PSOE por "presentarnos unha emenda para que suprimamos a Comisión do Alvia"
O PSOE e o PP non queren a Comisión de Investigación do Alvia
Por enésima vez, subliñou Rosana Pérez, solicitamos a constitución dunha Comisión de Investigación sobre un dos maiores sinistros ferroviarios da historia, a do tren Alvia en Santiago de Compostela.
A deputada do BNG dirixiuse ás bancadas do PSOE para deixar claro que desde logo rexeitamos a emenda que lamentabelmente nos presentou o PSOE, solicitándonos que suprimamos precisamente o punto no que demandamos a Comisión de Investigación. Cremos que o PSOE neste tema é pouco intelixente e ademáis é absolutamente irresponsábel. Fica claro que tanto o PP como o PSOE teñen moito que agochar nesta cuestión.
A deputada nacionalista avanzou na explicación do resto das propostas do BNG en materia de infraestruturas como a transferencia da xestión dos aeroportos ao Goberno galego, e o traspaso da rede ferroviaria convencional interna. Tamén pedimos que se recupere a titularidade pública da autoestrada AP-9 e un programa de descontos para os usuarios da AP-9.
En materia de infraestruturas, engadimos a solicitude de que se asegure a dupla vía no AVE de Madrid a Galiza que está en entredito na actualidade, e que se recupere definitivamente o tramo Ferrol-A Coruña no Eixo Atlántico ferroviario.
En canto ao sectores produtivos, Rosana Pérez explicou que demandamos un reparto das cotas para a pesca e das axudas da PAC ao agro equitativas.
Non se esquece ao naval, un sector estratéxico e vital para a nosa economía, pedimos o levantamento do veto que pesa sobre Navantia Fene para construir buques civís, carga de traballo para os nosos estaleiros e a construcción do prometido mil veces dique flotante.
No que atinxe ás demais proposta do BNG enmarcadas nun carácter social, económico e político, e destacou o recoñecemento do lexítimo dereito a decidir das nacións do estado fronte ao contumaz inmovilismo do Goberno que se nega a modificar o modelo de estado.
Salientou a necesidade de descentralizar os tributos para que revirtan en Galiza e por último, aportamos unha serie de medidas sociais encamiñadas a recuperar os dereitos que este Goberno nos quitou, e a impedir que siga quitándonos dereitos como coa reforma do aborto e a lei de seguridade cidadá.
Estas propostas de resolución foron rexeitadas.