Pontón: “Arroxo será o próximo alcalde e colocará Lugo no máis alto”

A portavoz nacional, Ana Pontón, participou no mitin de Lugo acompañando ao candidato á Alcaldía, Rubén Arroxo, a quen presentou como o próximo alcalde de Lugo, convencida de que a cidade vai optar nas urnas por un cambio histórico cun goberno liderado polo BNG tras o 28M.

“Estes catro anos a nosa presenza no goberno municipal foi fundamental para dar un gran salto adiante, para revitalizar a cidade e poñer ás persoas no centro, pero no BNG somos inconformistas e queremos o mellor para Lugo, por iso  queremos liderar esta cidade, poñela no máis alto, situala á cabeza de Galiza e impulsala cara o futuro da man de Rubén Arroxo como próximo alcalde de Lugo”, proclamou Pontón.

A portavoz nacional destacou a fortaleza dun BNG que representa a Galiza de futuro, imparable e puxante, fronte a un PP desnortado, esgotado e sen nada que ofrecerlle ao País, “somos un BNG que medra e que vai a máis, fronte a un PP minguante que vai a menos e que representa o pasado”, recalcou.

Pontón advertiu contra un Partido Popular que agora promete “castelos de aire” despois de catorce anos discriminando á cidade, e ironizou coas declaracións de Feijóo de xira electoral pola urbe da muralla criticaba o seu illamento pola falta de comunicacións, “hai que ter valor!”, indicou, destacando que a folla de servizos do PP con Lugo é unha folla en branco na Tinería, en equipamentos, en vivenda pública ou  en benestar social.

“Este 28M imos empezar a construír unha Galiza en grande, concello a concello e tendes a miña palabra de que a presidenta que aspiro a ser terá un compromiso total con Lugo, non por favoritismo, senón porque é o xusto”, subliñou. Pontón apelou a sumar no BNG “todo o voto de progreso, de optimismo e de confianza en Lugo, todo o vota da cidadanía que quere frear á dereita e poñer esta cidade no máis alto”.

A líder do Bloque destacou que Arroxo é o alcalde que ten “a enerxía, as ideas e a capacidade” para transformar a cidade da man do modelo municipal de éxito do BNG, para reactivar o campus como motor da ciencia e da innovación, apostando pola sustentabilidade e a economía circular; para potenciar o comercio de proximidade, para relanzar o turismo, para dinamizar os sectores produtivos, para xerar oportunidades para a xente nova e para crear novos equipamentos sociais para a infancia, a mocidade e as persoas maiores.

“En definitiva, Rubén é o alcalde capaz de facer  de Lugo unha das mellores cidades de Europa en calidade de vida, cohesión social, e benestar”, destacou. Pontón fixo unha apelación á xente moza, á que animou a coller a papeleta do BNG, “asegúrovos non vos imos defraudar”, concluíu, destacando que Arroxo “é o alcalde que Lugo precisa porque leva a cidade na cabeza e no corazón, ten proxecto, liderado e equipo”.

Pola súa parte, Arroxo sinalou que o BNG traballará a partir do 28M para completar o cambio que Lugo comezou neste mandato. "Hai catro anos todo o mundo falaba de que Lugo estaba paralizado, hoxe iso xa non se escoita, e o que cambiou foi que o BNG entrou no goberno", afirmou.

Lembrou que presenta un programa "realista e ambicioso” centrado en tres puntos fundamentais: poñer a Lugo no mapa e reclamar ao resto de institucións que executen as infraestruturas que levan anos debendo; potenciar as zonas verdes, freando os efectos do cambio climático e mellorando a calidade de vida da veciñanza, e potenciar o patrimonio histórico e natural, "facendo do noso concello un lugar mellor, acolledor e do que toda a cidadanía sinta orgullo", afirmou Arroxo.

Por unha cidade máis sustentable

O candidato destacou o avance de Lugo, con quince novas rúas peonís tanto no centro da cidade como nos distintos barrios, 18.000 metros cadrados de novos espazos peonís en zonas como a Milagrosa, o Sagrado Corazón, Recatelo, Acea de Olga ou a Piringalla. "A partir do domingo seguiremos traballando, para garantir que todas as veciñas e veciños de Lugo conten cun espazo peonil a menos de 5 minutos do seu fogar".

Avanzar na conservación do medio ambiente e reducir os efectos do cambio climático será unha das prioridades. "Garantir o mantemento do parque do Rato e ampliar as zonas verdes serán dous obxectivos prioritarios" anunciou Arroxo, así como o uso das enerxías renovables, a creación de novos espazos peonís e de zonas de paseo con sombra en todo o tecido urbano permitirán que Lugo contribúa a reducir a pegada de carbono ao mesmo tempo que mellora a calidade de vida.

"Temos a muralla máis antiga do mundo que se conserva na súa totalidade, é  un monumento que, polo seu contexto histórico, é moito máis importante que a torre Eiffel ou a Estatua da Liberdade", afirmou Arroxo, e destacou que "sería inconcibible ver 15.000 coches diarios rozando as pirámides de Guiza, mais en Lugo facíano coa muralla máis antiga do mundo que se conserva completa", exemplificou como conclusión.