Paixón, ideas, alternativas
A Convención desbaldiu paixón, ideas, alternativas. Aí o BNG non reparou en medios: empregou todas as súas enerxías para mostrar que si hai alternativa e que en Bloque podemos!
Miguel Anxo Fernández Lores, membro da Executiva e alcalde de Pontevedra
Lores foi contundente: Hai escasas diferenzas entre o Partido popular e o PSOE é o peor é que Galiza está nunha situación límite e de auténtica emerxencia nacional.
O alcalde de Pontevedra asegurou que non é momento de nostalxias paralizantes nin de mirar para a trás, parafraseando a Castelao animou aos presentes a non esperar que veña de fóra o remedio ou a esperanza porque son tempos de xenerosidade, compromiso e mobilización, dixo, en Bloque podemos, viva Galiza.
Ana Miranda, eurodeputada
Ana Miranda afirmou que o BNG defende a quen padece a crise e non a quen a provoca. Nos vindeiros meses, engadiu, saberemos as novas regras de xogo para o sector naval, agrario e pesqueiro e coñeceremos o financiamento que recibirá Galiza dos fondos de cohesión europeos, o BNG terá entón a oportunidade de facer propostas positivas en defensa do noso país ante a inoperancia e falta de responsabilidade do Goberno da Xunta.
Miranda rematou a súa intervención afirmando que só o BNG defende o saneamento das nosas rías, un trato diferencial para a pesca e o marisqueo e un discurso coherente para o sector naval, aquí, en Madrid e en Bruxelas.
Rafa Villar, membro da Executiva e concelleiro en Santiago
Rafa Villar comezou a súa alocución co lema do BNG, en Bloque Podemos porque en Bloque, dixo, somos quen de gañar vontades, de conquistar o futuro e a soberanía nacional.
Villar non escatimou críticas á Reforma Laboral que socava dereitos e nos condena a máis desemprego, e defendeu as mobilizacións sociais contra os ataques á educación polas nocivas políticas de recortes do Partido Popular.
Sandra González, membro da Executiva e alcaldesa de Tomiño
A alcaldesa de Tomiño, Sandra González, emocionada tras escoitar os compases da Treboada de Tomiño que encheron o Pazo de Congresos, principiou asegurando que levamos tres anos sufrindo o desgoberno do Partido Popular, foron tres anos do desemprego, desfeitas de conquistas sociais, desmantelamento das caixas e destrución do naval.
En resumen, dixo, se preguntamos á xente que fixo Feijoo estes anos diríamos que non fixo nada, desfixo, concluíu.
Iria Aboi, secretaria xeral de Galiza Nova
A mocidade do BNG asistente á Convención Nacional agardaba pola secretaria xeral de Galiza Nova que ao igual que os seus antecesores comezou cun enérxico En Bloque Podemos.
Aboi denunciou que o PP e PSOE comparten un deseño de Estado español e Unión Europa que nos afoga con políticas que recortan os dereitos e condenan sen futuro á mocidade galega.
Iría Aboi criticou que o conselleiro de Educación reducise a mera pataleta a mobilización estudantil recentemente celebrada en Galiza, temos forza para loitar polo dereito a decidir, pola soberanía e para seguir loitando polo dereito ao traballo e ao ensino.
Carlos Aymerich, membro da Executiva e deputado no Parlamento galego
Carlos Aymerich defendeu o traballo colectivo para derrotar ao Partido Popular, se traballamos arreo, xuntos e en bloque podemos conseguilo.
Aymerich utilizou a cita de Fausto, o barco do pobo sai triunfante se o povo for sempre o seu comandante e afirmou que avante toda co barco do BNG, en bloque e con Francisco Jorquera podemos.
Xavier Vence, membro do Consello Nacional
Xavier Vence afirmou que Galiza ten recursos e talento, non podemos resignarnos como fai o PP a prolongar a recesión e o paro para que este século sexa outro de emigración e deslocalización de empresas.
Apostou por outro goberno e un sistema financeiro afastado da especulación, por unha banca pública galega como a dos países avanzados do mundo e rematou recordándolle a Feijóo que a banca pública tamén existe en Occidente: en Alemaña, Franza, Noruega, Suíza porque quen ten banca pública, ten industria".
Ana Pontón, membro da Executiva e portavoz do grupo parlamentar
A portavoz do grupo parlamentar convidou ás e aos presentes a parar a este Goberno galego antes de que arrase este país.
Pontón defendeu que hai que deixar atrás as políticas neoliberais e foi moi contundente ao asegurar que o que vivemos non é unha crise, senón unha "estafa social" e un "golpe de Estado contra a democracia e as maiorías sociais".
[gallery link="file" columns="4"]