Mini Rivas: “A dous días das eleccións Medio Ambiente fai o que non fixo en catro anos: aprobar axudas polos danos do xabaril e o lobo”
O candidato do BNG pola provincia da Coruña, Xosé Luís Rivas, denunciou hoxe en Moeche que a Consellería de Medio Ambiente está a chamar a gandeiros e gandeiras para informalos da rectificación pola que axudas denegadas por danos provocados polo xabaril e o lobo serán aprobadas e abonadas na cantidade solicitada.
Para o nacionalista, este proceder resulta “electoralista” e forma parte das “prácticas caciquís do Partido popular”. Rivas pediu en Moeche unha grande participación o vindeiro 12 de Xullo para que o BNG lidere o goberno galego e poida “erradicar comportamentos como o exhibido hoxe polo Partido popular a través da consellería de Medio Ambiente” tentando convencer aos gandeiros e gandeiras que “o seu voto vale a contía da subvención solicitada”.
O candidato do BNG visitou o concello de Moeche onde foi recibido pola alcaldesa, Beatriz Bascoy e acompañado polo alcalde de San Sadurniño, Secundino García para visitar as instalacións do futuro Centro Comarcal de Desenvolvemento rural e participar nun mitin onde pediu concentrar o voto o vindeiro 12 de xullo para iniciar “o tempo novo que precisa Galiza cun goberno liderado por unha muller, nacionalista, feminista, por Ana Pontón”.
Tras a visita ao futuro Centro Comarcal de Desenvolvemento rural, Rivas explicou que o centro acollerá diferentes cursos de formación e servirá de apoio aos produtos de horta e autoconsumo excendentarios co fin de que cheguen ao mercado en óptimas condicións sanitarias e hixiénicas. O Centro, ademais de apoiar iniciativas en materia de innovación porá a disposición dos produtores, produtoras, labradores e labradoras os mecanismos e sistemas necesarios para dinamizar a horta e fruticultura próspera da zona. O centro dedicará a súa actividade á transformación de produtos primando a calidade do sabor e poñendo en valor unha froita máis sostible. Para o candidato do BNG, o futuro centro de Moeche “potenciará a próspera fruticultura e aportará as garantías sanitarias para a súa posterior venda”.
Xosé Luís Rivas destacou a implicación dos concellos de Moeche, San Sadurniño, Valdoviño e Cerdido neste proxecto que persigue a excelencia acadada con experiencias semellantes en diferentes partes de Europa.