Mini: “Medio Ambiente responsabilizando a gandeiros e agricultores da recollida de plásticos agricolas”
A consellaría incumpre un acordo parlamentario que obriga á Xunta a colaborar cos concellos na recollida.
O BNG pide equiparar o problema dos plásticos no mar e nas rías cos producidos na terra
O deputado do BNG, Xosé Luís Rivas denuncia o “incumprimento do acordo parlamentario”, do mes de novembro do 2018, que obrigaba á Xunta a seguir colaborando cos concellos na recollida e transporte dos residuos de plásticos agrarios á xestores autorizados para a súa reciclaxe.
O nacionalista denuncia que na actualidade, gran parte destes residuos están a ser depositados en contedores domésticos sen que polo momento a consellería de Medio Ambiente actúe a pesar de “ser residuos plásticos de composición identificable que facilita a súa reutilización, previo proceso en planta”.
Rivas critica a actitude “cicateira” de Medio Ambiente porque a cantidade que se destinaba á xestión destes residuos situábase en 24.200 euros, unha cantidade, en opinión do deputado “irrisoria” para resolver un problema que incide negativamente no equilibrio medioambiental.
O deputado tamén sinala que os plásticos agrarios recollidos anualmente nunca superaron as 4mil toneladas sobre un total de 8.000 e ao seu xuízo, agora estamos ante unha situación que coloca aos gandeiros, agricultores e concellos ante un problema que é medioambiental e polo tanto “responsabilidade da consellería de Medio Ambiente”.
Rivas lamenta que se produzan tantas declaracións institucionais sobre o grave problema dos plásticos depositados no mar e nas rías ao tempo que a conselleira de Medio ambiente mostra “unha sensibilidade nula” dos residuos xerados pola actividade agrícola e gandeira. Unha vez, máis quere lembrar que o BNG rexistrou diversas iniciativas para preservar o medio ambiente e anunciou que esta será unha prioridade política para o BNG no comezo da actividade parlamentaria.