Jorquera:"A trama dos cursos mantiña en nómina a cargos públicos"
O BNG solicitou abrir unha comisión de investigación sobre a presunta fraude e malversación de fondos públicos en cursos de formación sufragados pola Xunta de Galiza que o PP rexeitou
Pleno.- O portavoz do grupo parlamentario do BNG, Francisco Jorquera reclamou hoxe no Parlamento galego crear unha comisión de investigación sobre a malversación de fondos públicos en cursos de formación sufragados pola Xunta de Galiza, trama que tiña en nómina a cargos públicos e xestionaba contratos cos responsábeis de organismos da Xunta.
Na defensa da solicitude da Comisión que o PP rexeitou, Jorquera explicou que o levantamento do segredo de sumario da Operación Z permite coñecer datos sobre a fraude na organización dos cursos que apuntan a unha trama de entidades ficticias creadas para organizar cursos que en moitas ocasións nin chegaron a realizar.
Cartos en B para sufragar o Partido popular
O parlamentario afirmou que a trama dos cursos desviaba diñeiro das subvencións para pagos en negro o Partido popular e mantiña relacións privilexiadas cos seus dirixentes, incluído o propio Presidente da Xunta. Neste sentido, lembrou que o xefe da trama, Gerardo Crespo admitiu que Pachi Lucas, o abreportas durmiu moitas veces en Montepío e foi advertido por Núñez Feijóo dos pinchazos telefónicos aos que estaba sometido o que demostra, á xuízo do nacionalista, a existencia dunha grande amizade entre ambos.
Vostedes están enriba dun volcán e non sei se son conscientes da indignación social que provocan os continuos casos de corrupción. A sociedade, remarcou Jorquera, xa non lle vale as boas palabras, as declaracións retóricas e facer que se fai.
A sociedade está farta de corrupción, quere limpeza
Hai que blindar a verdade e non de boquilla, e acabar coa desamortización do patrimonio de todos para que uns poucos fagan negocio. A xustiza, é lenta e cando o cancro corroe a democracia, hai que actuar, sentenciou.
É necesario investigar no plano político para depurar responsabilidades e no escándalo dos cursos de formación, no mellor dos casos fallaron os mecanismos de control.
Dende o BNG, advertiu, non lle temos medo a verdade e cremos que hai claros indicios de que estamos ante unha trama coñecida e consentida con complicidades ao máis alto nivel.
A sociedade no vai a entender que o Partido popular esixa unha comisión de investigación en Andalucía para investigar os EREs e en Galiza impidan coñecer a verdade da fraude dos cursos de formación. Se de verdade son demócratas, esa é unha razón máis para investigar, apoien a creación desta comisión, concluíu.