Jorquera a Feijóo: "Non ten proxecto de País e conduce a Galiza á irrelevancia"
O portavoz do BNG no Parlamento galego diagnostica os problemas reais fronte a Galiza virtual debuxada polo presidente da Xunta. Jorquera propuxo unha batería de medidas para a loita efectiva contra a corrupción
DEBATE DE POLÍTICA XERAL.- O BNG utilizou o debate sobre o estado da nación para describir a situación da Galiza real e desmontar a Galiza virtual debuxada polo presidente da Xunta. 300.000 parad@s, 650.000 persoas en risco de exclusión social, 100.000 moz@s na emigración, duplicouse a taxa de paro feminino, unha de cada dúas persoas non chega a mileurista, e seis de cada dez familias teñen dificultades para chegar a fin de mes.
Pese a este desastre económico e social, o portavoz parlamentario, Francisco Jorquera, sentenciou que Feijóo non ten proxecto de goberno, nin de país, polo contrario, dáse o paradoxo de que preside un goberno autonómico, mais non cree no autogoberno e mantén unha posición de submisión a Madrid que conduce a Galiza a irrelevancia política, económica e social.
Jorquera enumerou as consecuencias para Galiza: Navantia traslada carga de traballo dos estaleiros de Ferrol para Cádiz, -e di que se entera pola prensa-, o país exporta electricidade pero non ten unha tarifa propia para as empresas galegas que si ten Euskadi, acepta que Madrid paralice o desenvolvemento do sector eólico, o sistema de financiamento fixo perder a Galiza 6.561 millóns de euros, -dúas veces o orzamento de sanidade-, e permite o espolio do aforro galego.
O problema é que no debate estatal non existe unha posición galega pola súa dimisión á hora de exercer os seus deberes como presidente, sentenciou Jorquera, para quen o que precisa o país é avanzar no seu autogoberno e advirte a Feijóo que Galiza corre o risco de perder o último tren porque ignora que o estado español está entrando nunha segunda transición, mentres Euskadi e Catalunya terán no futuro amplos espazos de libre decisión.
Jorquera reiterou que Galiza precisa decidir por si mesma e ter ferramentas para construír un novo modelo social que permita salvagardar os servizos públicos, potenciar os sectores produtivos, dispor dun sistema de financiamento xusto para o país, e apoiar a xeración de emprego que permita non dar carta de normalidade a formar a xente nova para emigrar.
Contra a corrupción
Jorquera tamén abordou a loita contra a corrupción en resposta a petición de acordos lanzada por Feijóo e propuxo medidas concretas: fin das portas xiratorias, da privatización de servizos e das reformas que recortan o Parlamento.
Quere acordos contra a corrupción? Pois ataquemos as súas causas: acabemos coa política das portas xiratorias, acabemos coa privatización de servizos públicos, caldo de cultivo do tráfico de influencias, fomentemos a participación impulsando as consultas populares, rexeneremos a democracia cunha RTVG ao servizo da sociedade e non da propaganda do Goberno, e renuncie a cambiar a lei electoral sen consenso, argumentou Jorquera.
O portavoz parlamentario rematou o seu discurso parabenizando ás mulleres que coa súa loita fixeron recuar ao PP na súa contrarreforma do aborto, ratificou o compromiso do BNG cos emigrantes retornados perseguidos por Montoro, e solicitando unha posición de país para negociar un novo modelo de financiamento autonómico.
Jorquera concluíu asegurando que o nacionalismo galego non parará ata que o noso pobo vexa recoñecido os seus dereitos, desde o convencemento de que Galiza necesita poder decidir.