Jorquera: "Ausentámonos do Pleno en sinal de protesta por este xeito de gobernar"
Jorquera enfatizou que a suba do IVE ou a suspensión da paga extra dos funcionarios que desde Aznar perderon o 26% do seu poder adquisitivo, provocarán unha caída do consumo e máis crise. Censurou o aumento do IVE porque con 5,6 millóns de parados, con millóns de persoas que miran con envexa aos mileuristas, vostés equiparan o IVE ao dos países con salarios máis altos.
Mais non moven un dedo para combater a fraude fiscal, unha fraude que por se mesma representa unha merma de ingresos superior ao recorte. Jorquera reprochou a Montoro que reduzan o poder adquisitivo dos pensionistas e empregados públicos, que recorten as prestacións de desemprego e decreten o fin da dependencia, rebaixando ao tempo as cotizacións sociais. "Esa é a maneira que teñen vostés de entender a equidade social, espetou.
Fan o contrario do que prometeron, perderon a credibilidade
Jorquera acusou ao PP de practicar un duplo discurso que xa ninguén se cre. É falso que non teñan máis remedio, é falso que carezan de marxe de elección. Criticou ao Goberno por utilizar a crise para impór un modelo que acentuará o reparto inxusto da riqueza. En sete meses dilapidaron a confianza dada polos cidadáns, perderon toda credibilidade e fan gala dunha insensibilidade clamorosa.
Reprochou ao PP os aplausos a Rajoy cando anunciaba recortes brutais. Imaxes, dixo, que nos retraen a tempos pasados cando a mesma bancada aplausaba a participación española nunha guerra. Lembrou que o PP está a facer o contrario do que prometeron e están a incorrer nunha auténtica fraude eleitoral porque ningunha destas medidas estaban no seu programa. Emprazou ao Goberno a consultar á sociedade, a celebrar un Referendo ou disolver o Parlamento e convocar eleccións. Teñan a valentía de devolver a democracia aos seus lexítimos donos.
Jorquera rematou dicindo que o BNG non vai participar dunha votación que é un paripé porque son medidas a consultar á cidadanía. Ausentarémonos do Pleno en sinal de protesta.