Jorquera atribúe a Feijóo o "mérito" de ser o presidente que máis dano causou ao galego
O BNG tira de datos para evidenciar o fracaso da política lingüística da Xunta que se traduce nunha perda de 300.000 falantes, no feito de que o 75% dos menores de 15 anos non falan nunca ou case nunca o galego, e apela ás miles de persoas que veñen de reclamar na rúa a defensa do idioma propio na manifestación convocada por Queremos Galego!
Ese é o resultado de políticas que tratan ao galego como un idioma estranxeiro no seu propio país e negan o dereito a vivir con normalidade na lingua propia, argumentou o portavoz parlamentario, Francisco Jorquera, na súa interpelación ao presidente da Xunta, a quen atribúe levar o idioma do país a unha situación límite.
Señor Feijóo, renuncie a servir á doma e castración de Galiza, non condene a morte ao galego, recriminou, ao tempo que o instaba a exercer como responsable do Goberno deste país, en lugar de buscarse un lugar na historia como o presidente que máis dano fixo a nosa maior obra colectiva.
Para o BNG a clave para garantir o futuro do galego está en lograr a igualdade e mudar a situación normativa que o coloca por debaixo do castelán por obra do decreto do plurilingüismo e do incumprimento do Plan de Normalización Lingüística.
500 disposicións legais protexen ao castelán e as poucas que protexían ao galego, vostede anulounas. Cumpra o Plan de Normalización Lingüística e derogue o decreto do plurilingüismo, reclamou Jorquera, que ten provocado que o ensino en galego non chegue ao 20% e o ensino en infantil nas cidades non chega ao 40%. Niso consiste o plurilingüismo, en impoñer o monolingüismo de feito.
Hai que acabar coa desigualdade que padece o galego, concluíu o portavoz parlamentario, tras denunciar o disparate de subvencionar con recursos públicos a educación na ignorancia, como se vai facer coas catro familias que solicitaron educación privada en castelán en aplicación da LOMCE, das que ademais se serviu para inventar a suposta imposición do galego.