Guillerme, no Consello Nacional: "O Goberno Feijóo ten que ser substituído e canto antes, mellor"
O portavoz nacional do BNG, Guillerme Vázquez, afirmou este sábado que o Goberno Feijóo non merece máis marxe de confianza e si, en troca, merece ser substituído e canto antes, mellor.
Para o líder nacionalista, o Goberno Feijóo é un goberno letal para Galiza por ser sumiso con Madrid e cos poderosos e cruel, teño que dicilo así, cruel, cos máis débiles.
Guillerme pronunciouse nestes termos durante o discurso de abertura do Consello Nacional da formación nacionalista, intervención na que analisou o traballo realizado polo BNG desde a anterior sesión plenaria do máximo órgao entre asembleas.
O Consello aprobou o recoñecimento como colectivos do Movemento Galego ao Socialismo e de Abrente, Esquerda Democrática Galega
Nesta reunión de hoxe, como se encargou de informar Guillerme na súa intervención, o Consello Nacional aprobou o recoñecimento como colectivos organizados no seo do BNG do Movemento Galego ao Socialismo e de Abrente, Esquerda Democrática Galega.
No seu discurso, caracterizou a situación de Galiza de emerxencia nacional pola acción combinada das políticas europeas coa nefasta xestión dos gobernos central e galego.
Afronta esa emerxencia nacional un goberno, o de Feijóo, que Guillerme non dubidou en tildar como o pior goberno da historia de Galiza. Agora, dixo, co Goberno Amigo en Madrid, xa non ten nin o recurso de culpar a outros da súa propia inoperancia.
O portavoz nacional acusou directamente a Feijóo de ser corresponsábel da case que inevitábel expatriación do aforro galego, espolio que se vai producir no medio do escándalo das indemnizacións multimillonarias dos directivos e da estafa das participacións preferentes, sen que en ningún momento Feijóo teña reaxido.
Para Rajoy, seica o importante é salvar o euro, aínda que nos acabe afogando a todas e a todos nós
Denunciou Guillerme que o mesmo Feijóo que agora renega dos directivos das caixas non hai tantos meses promoveu -coa soa oposición do BNG, enfatizou o portavoz nacional- a reforma da lei de caixas para garantir a continuidade deses executivos nos órgaos de dirección da entidade resultante da fusión.
Señor Feijóo, Comisión de Investigación, xa!, demandou un Guillerme para quen resulta evidente que as escusas para demorar a súa constitución responden a que o PP e o presidente da Xunta teñen moito, moito, que agachar.
Degradación da Democracia
O líder nacionalista acusou tamén a Feijóo de limitar o exercicio da Democracia ao coartar os debates no Parlamento galego -como fixo ao obstruír as ILPs sobre a sanidade ou preescolar na casa.
Este é un goberno esperpéntico desde o primeiro día, remarcou Guillerme, quen salientou que ten entre os seus membros a un conselleiro de Industria que ten a súa propia industria, pero en Portugal!!!!.
Un Goberno que comezou no Desván de los Monjes, brincou, e que agora xa ve como a señora Castaño é acusada de malversar fondos da Fundación Cela, xenerosamente regada con cartos públicos, antes e agora, por responsabilidade do PP.
Degrádase a democracia tamén cando e sen pórse colorado, e iso ten moito mérito, o presidente da Xunta volta a anunciar agora a contrución de 11 centros de saúde, os mesmos 11 centros de saúde cuxa edificación anunciou hai 3 anos sen ter feito até agora nin o primeiro.
Rescate á banca, saqueo ao pobo
Tamén dedicou tempo do seu discurso a valorar a recente cimeira europea. Guillerme acusou a Rajoy de falsear a realidade cando afirma que o rescate non vai supor novos recortes para o pobo.
En Bruxelas non sei se salvaron o euro, o que si sei é que non salvaron o pobo galego do espolio que non cesa, que sigue en marcha, afirmou Guillerme, quen a seguir subliñou que do rescate do pobo teremos que encargarnos nós mesmos rebelándonos contra esta barbarie.
Para Rajoy seica o importante é salvar o euro, aínda que o euro acabe afogándonos a todas e a todos nós, denunciou Guillerme.
Claro que Europa pon condicións e claro que continuarán os recortes. Enumerounos Guillerme: Apartir de mañá, haberá que pagar máis polos medicamentos. Subirá a luz un 4 por cento. Aumentará tamén o prezo do gas. O da bombona de butano nun 6 por cento. E no horizonte agárdanos o aumento do IVE. Subirán os prezos de todos os produtos, tamén os de primeira necesidade, nun contexto en que os salarios continuarán a descer.
O corolario vai ser máis sufrimento, máis recesión e máis paro no que constitúe o que Guillerme definiu como un círculo vicioso infernal.
Por todo isto, o portavoz nacional chamou a camiñar na dirección contraria á que propón o Partido Popular, por certo co xa non disimulado apoio do Partido Socialista.
Tarefas para o vindeiro período: un 25-X masivo
O portavoz nacional mostrou a súa satisfacción por que o BNG está a traballar moito e ben, unha satisfacción que non é autocompracencia porque, matizou, debemos traballar aínda máis e mellor porque a grave situación de crise económica e social así o require.
O Goberno Feijóo é letal para Galiza, sumiso con Madrid e cos poderosos e cruel cos máis débiles
En nome da Executiva, Guillerme quixo trasladar os parabéns polo traballo desenvolvido por todas e a todos vós, afirmou en alusión aos membros do Consello Nacional. A felicitación estendeuna ao conxunto de toda a militancia do BNG polo seu entusiasmo e sobreesforzo.
Sinalou as tarefas do vindeiro período para o BNG: Combater politica e socialmente as desastrosas políticas do PP e difundirmos as nosas alternativas.
No imediato, o desafío é o de facer do Día da Patria Galega un gran día de mobilización baixo o lema de Rescata os Teus Dereitos. En Bloque Podemos, así como continuar a preparármonos para afrontar con suceso o vindeiro proceso eleitoral.