Guillerme fala de "día negro" para Galiza e chama á "rebelión" e á "insumisión" fronte aos recortes
O portavoz nacional do BNG, Guillerme Vázquez, cualificou a xornada deste mércores de día negro para Galiza e para o conxunto das maiorías sociais e chamou á rebelión e á insumisión fronte o novo paquete de recortes anunciados no Congreso por Mariano Rajoy.
Guillerme Vázquez, en declaracións aos medios logo dun encontro de traballo con cargos institucionais e orgánicos do BNG en Vilagarcía, afirmou que as medidas que vai aplicar o goberno non son reformas senón que son un auténtico roubo á xente e o PP non ten lexitimidade democrática para aplicalas.
Referéndum ou novas elecións
Neste sentido, o voceiro nacionalista advertiu que o argumento de Rajoy de que o avalan os votos non é válido, pois non se presentou ás elecións con este programa, e convidouno a que convoque un referéndum ou uns novos comicios e se presente aos mesmos co programa da troika e logo os cidadáns decidan.
O PP non ten lexitimidade democrática para aplicar estes recortes, ten que convocar un referendum ou eleccións e presentarse co programa da troika
Rajoy, que pide comprensión e apoio para as súas medidas engadiu- non o vai atopar no BNG, pois dende o BNG chamamos á insumisión e á rebelión fronte a unhas medidas inxustas e inútiles, que non van á raíz dos problemas, agora hai un novo recortazo pero mañá os mercados volverán pedir máis.
Para Guillerme Vázquez, minta o que minta o presidente do goberno do Estado, a realidade é que España está intervida, como vén denunciando o BNG dende hai días, pois as medidas que se van aplicar son exactamente as mesmas que xa se aplicaron en Grecia e Portugal, cuns resultados estupendos, ironizou.
Máis recesión e menos soberanía
O líder nacionalista lamentou que o PP siga empeñando en ir por unha senda que non vai resolver a crise senón que a vai agravar, que vai ser un desastre tanto para a poboación, con máis paro, máis desigualades, máis marxinalidade, como para os pobos, coa perda de soberanía.
Vázquez tamén criticou o descaro de Rajoy ao facer unha proposta que é un trasvase directo dos recursos das persoas á banca, que o presidente incluso cuantificou en 65.000 millóns de euros en dous anos e medio, que son as cifras que se están a manexar para a recapitalización da banca.
Hoxe é un día negro para a sociedade pero seguro que é de alegría para a banca e os especuladores. Por esta vía non hai saída posíbel, por iso hai que dicir basta xa e ir polo camiño totalmente contrario, no que se recupere a democracia, os gobernos para os cidadáns e non para os banqueiros, a soberanía e a capacidade de decisión dos pobos e o traballo como valor e como dereito, concluiu.