Finiquitar un réxime herdeiro do franquismo e dar paso a un proceso que recoñeza a GZ como nación
Esa era a síntese que facía o portavoz nacional, Xavier Vence, tras a comparecencia do monarca español anunciando a súa disposición a abdicar.
O BNG propón un novo proceso constituínte que permita unha profunda democratización das institucións nun marco que só pode ser republicano, que remate coa corrupción das institucións, -incluída a propia Monarquía e os partidos sistémicos como o PP-, que recoñeza a realidade das nacións que hoxe son negadas polo Estado español, incluído o dereito a decidir e, no caso de Galiza, que recoñeza o dereito a existir dun Estado galego, argumentou Vence.
É hora, de rematar definitivamente coa herdanza do franquismo, dun réxime baseado nunha transición controlada pola oligarquía e polo exército, indicou Vence, quen deixo claro que o BNG non vai aceptar un cambio cosmético para que Juan Carlos ceda un trono impopular e corrupto ao seu fillo Felipe.
Para o Bloque a actual Constitución monárquica consagrou un réxime que agora esta en crise terminal que se plasma nunha profunda crise democrática, social e de modelo territorial que, en ningún caso, pode pecharse nunha cerimonia de aliño guiada pola elite do Estado e polos poderes económicos para desviar a atención sobre os graves problemas do país e as reivindicacións soberanistas das nacións que conforman o Estado.
Non poden tapar nin bloquear o movemento cidadán que reivindica máis democracia e recoñecemento das nacións e o dereito a decidir. Non poden tapar e bloquear eses procesos cun cambio cosmético na cúpula do réxime, subliñou Vence, de aí a propostas do BNG de iniciar de inmediato un novo proceso constituínte, no que non ten cabida un réxime vitalicio e hereditario herdado do franquismo como é monarquía borbónica española.
O Bloque confirma o seu apoio e presenza nas concentracións convocadas ás 20.00 horas nas diferentes vilas e cidades do país baixo o lema Polo dereito a decidir, Galiza pola República.