Feijóo responde ao BNG que Europa manda "liquidar" as Caixas galegas
Jorquera acusou ao Presidente de ser cómplice necesario no espolio do aforro galego e copiar ao gran escapista Houdini
Pleno- Na quenda de preguntas ao Presidente, o portavoz do grupo parlamentario do BNG, Francisco Jorquera requiriu do titular da Xunta unha resposta clara sobre a súa posición ante a venta apresurada de Novagalicia banco.
Núñez Feijóo xustificou a venda tras a inxección de fondos europeos que aconsellan a súa liquidación e neste momento, dixo, existen entre seis e oito entidades interesadas na compra.
O presidente da Xunta non perdeu a oportunidade para unha vez máis, culpabilizar ao goberno tripartito da actual situación das caixas ao que o nacionalista respondeu ironicamente, eu confésome pecador por ter apoiado o bipartito, pola miña culpa, pola miña grandísima culpa pois o bipartito en só tres anos e medio foi capaz de arrasar cos inmensos logros da dereita que leva gobernando Galiza toda a vida.
Feita esta confesión, dixo, reitero a miña pregunta: vostede pensa asumir algunha vez a súa responsabilidade ou vai seguir sendo un profesional da demagoxia, porque de seguir así, vai pasar a historia competindo co gran escapista Houdini.
A venda de Novagalicia Banco non vai beneficiar a Galiza nin aos contribuíntes, a venda apresurada afirmou, beneficiará ao comprador que poderá descontar en impostos créditos fiscais por 4.500 millóns de euros dos 9.000 millóns insuflados para o saneamento.
Vostede de que lado está?. Vai demandar que se publique o prego de condicións da poxa, vai exixir que se manteña como entidade galega, recuperar o diñeiro público investido, manter os postos de traballo, que se devolvan os cartos a tod@ os estafad@s polas preferentes e que as coleccións artísticas da caixas fiquen en Galiza?.
Vai a esixir a paralización da poxa no caso de non darse estas condicións?. Asuma a súa responsabilidade dunha vez por todas, espetou o nacionalista.
Sen crédito non se crea emprego
A pasada semana fixéronse públicos os dados de paro en Galiza cunha subida en outubro por riba da media estatal, este é resultado das súas políticas.
Sen crédito non se pode investir e xerar emprego, só o 3,39% do crédito que se concede no Estado, explicou, beneficia a empresas e familias galegas polo que volveu preguntar a Feijóo se ten previsto actuar para paralizar a venda de NCG e traballar para conseguir unha entidade financeira vinculada a Galiza.
Jorquera concluíu a súa intervención alertado da desaparición do servizos centrais e boa parte da rede comercial da entidade así como do risco de ser mercada por fondos financeiros culpables da crise financeira internacional.