Feijóo minte cando anuncia unha baixada de impostos
Jorquera preguntará ao presidente da Xunta porqué segue enganando aos galegos e galegas con anuncios trampa
O portavoz do grupo parlamentario do BNG, Francisco Jorquera acusou hoxe ao Presidente da Xunta de mentir cando anuncia unha baixada no imposto do IRPF.
O parlamentario explicou, tras a xunta de Portavoces, que a medida anunciada por Feijóo no Debate do Estado da Nación, suporá unha cantidade entre 25 e 63 euros ao ano pero todos os galegos e galegas deberemos pagar o incremento do combustible consumo de 100 L. ao mes ingresaremos 55 euros para o céntimo sanitario), o canon da auga, a subida no recibo do lixo e diversos novos copagos, ao final os galegos e galegas pagaremos máis.
O recibo da luz, dixo, tamén será máis caro a pesar de producir Galiza moito máis do que consumimos. O BNG defenderá, neste sentido, unha Proposición non de lei no vindeiro pleno e interpelará o Goberno sobre outros copagos como o referido a medicamentos a enfermos crónicos. Reclamamos a presentación dun recurso de inconstitucionalidade sobre este novo imposto á enfermidade, dixo.
Asemade, outras cuestións como a situación real dos contratos con Pemex, contratos homologados para o sector vitivinícola e o desprazamentos da flota galega en augas comunitarias serán motivo de iniciativas do grupo parlamentario no vindeiro pleno.
Finalmente, Jorquera avanzou que o BNG non parará ata que se investiguen as verdadeiras causas do accidente de Angrois polo que a sesión plenaria debaterá como primeiro punto á petición nacionalista sobre a creación dunha comisión de investigación.