"Economía para as persoas", artigo de opinión de Carme Adán
"Economía para as persoas"
Comezou a IX lexislatura do noso Parlamento galego co obrigatorio debate de investidura. O candidato Feijóo esqueceu que detrás dos números, do déficit cero ou das quitas das preferentes hai persoas. Hai persoas sen traballo, sen bolsas de estudo, sen posibilidade de
afrontar o pago da hipoteca da súa vivenda.
Hai dramas humanos que ata hai ben pouco non podiamos imaxinar tan preto. De feito, ata hai ben pouco uns cobizosos bancos animaban xente a pedir un crédito. Quen non merca un piso é porque non quere, escoitábase nas oficinas das caixas. Hoxe as caixas galegas non existen e os banqueiros reclaman o que antes semellaban regalar.
Estes mesmos bancos e banqueiros reciben cartos públicos por despediren os seus empregados, reciben cartos públicos para tapar os seus buratos de mala xestión. Ese diñeiro público é unha parte fundamental da débeda pública actual. Esa débeda, tan socorrida para reducir persoal sanitario ou profesorado, é unha débeda en gran parte ilexítima.
Hoxe no Parlamento escoitamos a Jorquera pedir unha auditoría para non pagar a débeda que non é das persoas, senón dos bancos. Os parlamentarios e parlamentarias do PP rían. Eu aínda non entendo de que rían. ¿Onde está a graza de esixir que as persoas non paguemos
as débedas dos bancos? ¿Acaso alguén rescata as persoas desesperadas por non poder pagar a súa hipoteca? ¿Alguén rescata as persoas desesperadas porque non atopan traballo?
A economía necesita que lle deamos a volta. Cómpre que o BCE, FMI e demais gobernos financeiros e políticos deixen os números, as cifras ou os mercados de valores como única folla de ruta e miren as persoas. Estas son a verdadeira finalidade dun sistema económico, non un medio para o enriquecemento duns escollidos.