Davila pide explicacións a Facenda por privatizar o servizo telefónico de cita previa
Davila sinala que a Axencia Tributaria convocou un concurso para adxudicar por dous millóns de euros a xestión do servizo telefónico de cita previa. O prazo aberto para que as empresas poidan concorrer remata o 10 de novembro. A deputada do BNG alude á intención da Axencia Tributaria de implantar o sistema de xeito gradual. Cunha primeira fase até xaneiro de 2015 ofertando unha serie de servizos, e logo incorporando a partir desa data o resto dos servizos.
A deputada do BNG critica a lóxica que rixe neste Goberno que sempre xustifica as súas continuas privatizacións e externalizacións de servizos co argumento da racionalización de custes. Máis, sinala Davila, até organizacións sindicais denunciaron que esta privatización xerará un sobrecuste económico do 67%, 800.000 euros máis que se se contratase persoal na Axencia Tributaria.
Davila pregúntase polas verdadeiras razóns que motivan ao PP a facer esta privatización. Como noutros casos de privatizacións practicadas polo Goberno do PP en áreas estratéxicas, que deberían permanecer en máns públicas, sempre nos asalta a dúbida sobre as auténticas razóns do fervor gubernamental por privatizar, especialmente se se fundamentan en posibilidades de negocio a empresas de diverso espectro.
A parlamentar nacionalista dirixe ao Ministerio de Facenda unha batería de preguntas: Que razóns motivaron a decisión da Axencia Tributaria de proceder á privatización da xestión do servizo telefónico de cita previa? Por que non se mantén en máns públicas? Cando vai o Goberno a apostar pola creación de emprego público?.
E finalmente, pide ao Ministerio de Facenda que dea marcha atrás nesta decisión e convoque prazas públicas para cubrir os servizos da Axencia Tributaria.