Davila a Montoro: "Pensan que somos inconscientes e que non sabemos que crearon probeza"
Na súa intervención, Davila afirmou que se trata duns Orzamentos cos que o PP pretende edulcorar a súa oferta eleitoral para o 20-D. Inventáronse un optimismo tan fora da realidade que incluso outras instancias europeas lles chamaron a atención. As súas previsións de medre foron desmentidas tanto polas cifras da Comisión Europea como do FMI, como do BBVA.
Igual que foron desmentidas as súas previsións sobre o défice, sinalou a deputada do BNG. Máis, dálles igual. Vostedes o que queren é publicitar que son uns Orzamentos que van mellorar a economía en 2016. Davila díxolle a Montoro que como non cumpriron o programa de 2011, pretenden darlle credibilidade ao seu programa de 2016. E igual pensan que a desfeita social que fixeron está só no imaxinario popular, e que imos crer que haberá unha enorme bonanza porque están a crear moito emprego.
O Hospital de Vigo é un exemplo do deterioro practicado polo PP
Pensan que somos inconscientes e que non sabemos que o que vostedes están a crear é probeza, precariedade. Cecáis pensan que nos imos crer que van mellorar os servizos públicos que deterioraron durante 4 anos. E que nolo imos crer sobre todo os cidadáns do sul da provincia de Pontevedra que estamos a sofrer as gravísimas consecuencias da súa obsesión pola privatización da sanidade, espetou.
Referiuse á lamentábel situación do novo hospital de Vigo como exemplo do deterioro da sanidade pública: Estamos a sofrer as consecuencias dun novo hospital, que podemos resumir da seguinte maneira: en agosto os pacientes comían quente e a partir de setembro comen en frío. E iso cando comen, porque a maioría das veces teñen que devoltar a comida porque é inservíbel.
A parlamentar nacionalista puxo de manifesto que pódelles parecer demagoxia pero é a realidade que se está a sofrer en moitas áreas sanitarias como no novo hospital de Vigo, grazas a esa obsesión de facer da saúde un negocio e de facer da sanidade pública un negocio para que as empresas gañen cartos. Vostedes non poden dicernos que con estes Orzamentos van mellorar a vida das persoas porque as persoas hoxe viven as consecuencias das políticas do PP. A realidade é contumaz, Señor Montoro, rematou Davila.