Davila:"Con estes Orzamentos, o PP vai sacrificar ás persoas para salvar á banca"

A deputada do BNG, Olaia Fernández Davila, afirmou este mediodía, despois de escoitar a intervención do Ministro de Facenda, Cristóbal Montoro, que “con estos Orzamentos, Montoro e o Goberno do PP demostran que están dispostos a sacrificar ás persoas para salvar a banca”.

Davila fixo esta avaliación despois da intervención desta mañá do Ministro de Facenda para defender o proxecto de Orzamentos 2013, criticando especialmente que “só falase dos intereses da débeda, da banca e do défice, e cero das persoas”. Ademáis, salientou que crearán máis crise e máis paro.

A deputada do BNG

considerou que “Montoro deixou en evidencia que van contra a sanidade e a educación públicas, contra a dependencia, contra o sistema público, que sustentan sobre todo as CC.AA”. “O deseño do Goberno está claro: primeiro o pago da débeda, primeiro adicar cantidades astronómicas ao pago dos intereses da débeda, que se come boa parte dos Orzamentos, e en última instancia está a cidadanía”.

O BNG nunca “respaldará uns Orzamentos contra a xente”

Neste sentido, Davila puxo de manifesto que “boa parte da intervención de Montoro estivo adicada ao ámbito financeiro, á débeda, ao défice, e esqueceu o Estado de Benestar ou ás partidas que redundan na xente. Os intereses do Goberno non se sitúan na necesidade de preservar á cidadanía dos piores efectos da crise: salarios en caída libre, un consumo que non se reactiva, nen siquera lles interesa a creación de emprego á que tamén pode contribuir o Goberno con máis gasto productivo”.

Olaia Fernández Davila afirmou que “o BNG non pode apoiar nen falar ben dunhas contas que non miran para a xente, dunhas contas entregadas á banca e que socavan o Estado de Benestar”. Tildou de “brindis ao sol a manifestación de Montoro de promover o diálogo político. Porque só anima a presentar emendas para a correción do défice público. É dicer, enmendarlles a plana”.

“Aí non vai atopar ao BNG. O BNG só estará para aumentar os investimentos na educación e na sanidade públicas, en desenvolver a lei de dependencia, en facer máis investimento productivo que crea emprego, en non baixar os salarios dos empregados públicos, na revalorización das pensións. E cómo? Facendo unha reforma fiscal que grave máis aos que máis teñen. Perseguindo a fraude fiscal, rebaixando o gasto en defensa, eliminando deputacións e outras moitas medidas que se houbera vontade política se podería adoptar.