Davila dílle a Montoro que "se deixe de parches e faga unha reforma fiscal integral"
O BNG presentou unha emenda á totalidade a este proxecto porque as medidas fiscais que se contemplan son totalmente insuficientes cando o urxente é acometer unha reforma fiscal integral baseada na progresividade. Nese sentido, reprochou ao Goberno do PP o incremento do IVE, o aumento dos tipos de tributos indirectos, mentras se aproban amnistías fiscais aos defraudadores.
Precísanse máis medios para loitar contra a fraude fiscal
A deputada do BNG demandou ao Ministro máis medios e máis recursos para loitar contra a fraude fiscal. Necesitamos máis medios contra a fraude fiscal, temos un 80% menos de recursos contra a fraude que Alemaña e un 70% menos que Franza. E sinalou que son xa moitas as voces de expertos que advirten de que a crise fiscal é unha crise de ingresos. Por iso é urxente abordar unha reforma fiscal integral.
Un sistema fiscal inxusto
Advertiu da caída do 7% da capacidade recadatoria do Estado español mentras noutros países da UE como en Franza se aumentou a capacidade recadatoria. Davila reprochou a aprobación de sucesivas reformas de desarme fiscal que configuraron un sistema inxusto. Puxo de manifesto que se está incrementando de maneira alarmante a desigualdade social. Nesa liña, sinalou que no Estado español se aumentou cinco veces máis a desigualdade que na media da UE.
Subliñou que a presión fiscal no Estado español é inferior ao promedio europeo. O sistema fiscal existente non contribúe a combater as desigualdades sociais. Hai que correxir a situación de inxustiza cunha reforma fiscal para lograr máis recursos e que paguen máis os contribuíntes que máis teñen.
A parlamentar nacionalista afirma que as medidas deste proxecto son insuficientes e vostés demostran unha total falla de vontade política para afrontar a reforma fiscal que o Estado español precisa. Un remendo que non arranxa o problema. E criticou a diminución sen precedentes do imposto de sociedades.
Davila demandou ao Ministro Montoro que presenten unha reforma fiscal en toda regla baseada nos principios de equidade e progresividade para garantir maior xustiza impositiva e máis ingresos, de igual xeito que se garanta un mellor financiamento ás CC.AA.