Davila sobre o Decreto de Segunda Oportunidade:"É decepcionante e chega moi tarde"
A portavoz do BNG ironizou co nome do Decreto de segunda oportunidade, que só asume o lema pero non permite habilitar novas ocasións para reemprender a súa vida a persoas que padeceron os efectos da crise.
Seguimos agardando pola auténtica dación en pago
En relación á dación en pago, a deputada do BNG criticou que só se inclúa unha modificación mínima do Código de Boas Prácticas que segue a ser un Código que exclúe á maioría de afectados. Davila demandou a Guindos políticas valentes en materia de vivenda e que este Goberno nega, en alusión á dación en pago con carácter retroactiva, a moratoria real dos desafiuzamentos e o aluguer social.
A deputada do BNG censurou o Real Decreto porque continúa a lexislar contra os intereses da poboación e reprochou que continúen a defender os intereses dos bancos que a pesar de ter recibido axudas multimillonarias van a poder continuar practicando execucións hipotecarias.
A banca continúa a gañar
Sobre a eliminación das abusivas taxas xudiciais, a deputada nacionalista considerou que chega tarde, aínda que benvido sexa e lembrou que o BNG se opuxo desde sempre ao taxazo que limita o acceso universal á xustiza.
Censurou as medidas relativas ás bonificacións sociais porque insistir en bonificar cotizacións sociais, cando vemos que as empresas están aforrando moito en custes laborais debido á devaluación salarial, non parece a medida máis idónea e cargar gasto á Seguridade Social moito menos.
Davila díxolle a Guindos que o problema non son os custes laborais senón a necesidade de impulsar a economía produtiva, eido no que vostedes non se esforzaron nada.
Tamén chega moi tarde a medida de incluír ás persoas físicas nos procesos concursais, cando xa pasaron anos moi duros nos que a poboación endebedada non tivo mecanismos para aliviar a súa situación. Ademáis, reprochou ao Ministro de Economía a falla de retroactividade da medida. O que aprobaron no RD limítase a abrir a posibilidade de que as persoas físicas poidan acollerse a un procedemento concursal co fin de liquidar as débedas. Pero que sempre beneficia á banca que mantén moitas marxes para actuar en relación ás débedas.